پر افغان سیکانو برید غندل شوی او غبرګونه یې پارولي.
کابل ښار کې د اهل هنود او سیکانو پر عبادتځای دداعش وسله والې ډلې برید چې دښځو او ماشومانو په ګډون پنځه ویشت تنه په کې ووژل شول او اته تنه ټپيان شول په کور دننه او بهر غندل شوی دی.
پخواني ولسمشر حامد کرزي او عبدالله عبدالله له لوري اعلاميې خپرې شوي او دا برید یې د انسانیت او بشریت خلاف عمل یاد کړی دی.
د ملي امنیت شورا په سیکانو برید غندلی او دا برید یې د طالبانو د تاوتریخوالي د دوام پایله یاده کړې ده.
د ملي امنیت شورا داسې لیکلي ((دا ډول بریدونه او جنایات بې له شکه د دایمې اوربند په نشتون کې ترسره کیږي، ځکه نو افغان دولت په ځلونو پر دایمي سولې او اوربند چې په هیواد کې د جګړې د پای ته رسېدو تضمینونکي دی، ټینګار کړی دی.))
د هند د بهرنیو چارو وزارت هم په کابل کې د سیکانو په درمسال برید غندلی او دغه برید یې یو بد ترهګریز برید یاد کړی دی.
د هند د بهرنیو چارو وزارت داسې لیکلي ((دا یو بد ترهګریز برید دی، د لږکیو پر مذهبي عبادتځایونو دا نااټکل شوی برید د برید کوونکو او پلان کوونکو د ملاتړو شیطاني کړنې څرګندوي.))
د عامو افغانانو سربېره د ولسي جرګې غړو هم دغه برید په سختو الفاظو وغنده او دا یې د افغانستان د دښمنانو کار وباله.
د پاکستان د بهرنیو چارو وزارت هم دغه برید غندلی چې هیڅ ډول سیاسي او مذهبي توجیې نه لري.
د پاکستان د بهرنیو چارو وزارت داسې لیکلي ((داسې زړه بوګنونکي بریدونه نه سیاسي، نه مذهبي او نه هم اخلاقي توجیه لرِي، دا بریدونه د منلو وړ نه دي.))
کابل کې د امریکا سفارت بیا د برید غندلو تر څنګ ویلي چې دا ډول تاوتریخوالی هغه مهال له منځه تللی شي چې سوله راشي او خپلمنځي اختلافات لیري شي.
د امریکا سفارت داسې لیکلي ((موږ دغه جنایتکاران او افراطيان چې د عامو خلکو په عبادت ځایونو برید کوي غندو. سوله هغه مهال راتلی شي چې خلک خپلمنځي اختلافات د خبرو له لارې حل کړي نه د ټوپک له لاري.))
افغانستان کې د ملګرو ملتونو دفتر، ناټو، د ایران سفارت او ګڼ شمېر بهرنیو نورو سازمانونو او افغان سیاسیونو دغه برید غندلی او بشري جنایت یې بللی دی.
د دې برید په تړاو خواله رسنیو کې هم پراخ غبرګونونه راپورته شوي او ټولو سره پوښتنه دا ده چې ولې پر عبادت ځایونو بریدونه کېږي.
