په تېرو دوو اونیو کې له پاکستانه تر دې مهاله شاوخوا ۳۵۰ زره افغان کډوال هېواد ته راستانه شوي، د دې کډوالو شاوخوا ۲۰۰زره هغه يې یوازې د تورخم له لارې هېواد ته راستانه شوي او پاتې نور هغه د سپین بولدک، انګور اډې او نورو لارو هېواد ته را اوښتي دي.
د پاکستان وروستۍ پریکړې په اړه د غبرګونونو په دوام د دې هېواد د بهرنيو چارو مخکيني وزير او د پاکستان پيپلز ګوند مشر بلاول بوټو زرداري له خبريالانو سره خبرو کې د خپل هېواد د چارسمبالي حکومت له خوا د افغان کډوالو اېستلو پر پرېکړې سختې نیوکې کړي او زياته کړې يې ده، له افغان کډوالو سره شوی چلند نامناسب دی.
زرداري زیاته کړې:« کله چې یوه پالیسي طرحه کېږي، باید د خلکو او ترهګرو ترمنځ توپیر وشي. که چېرې تاسې د خلکو خلاف لاړ شئ، تاسو به هېڅکله خپل هدف ترلاسه نه کړای شئ.»
کلیپ: نجیب الله جامع د سیاسي چارو کارپوه مرتضي مطهري د سیاسي چارو کارپوه
زرداري د خپلو خبرو پر دوام زياته کړې، د ناراجسټر شویو افغان کډوالو د اېستلو په اړه د پاکستان د لنډمهالي حکومت په پالیسۍ کې ابهامات موجود دي.
اسلامي امارت ویاند ذبیح الله مجاهد بیا د نوموړي څرګندونې ستایي او وایي، پاکستاني چارواکي دې د افغانستان پر وړاندې تندې ویناوې نه کوي، بلکې د دواړو هېوادونو د ګټو په سنجولو سره دې له کابل سره اړيکې ټينګې کړي.
مجاهد زیاته کړې:« د زرداري دا موقف د ستایلو دی ځکه واقعیت هم همدا دی، باید توپير وشي او بل دا ده چې د دووهېوادونو ترمنځ اړیکې وساتل شي دا ډېره مهمه موضوع ده په ځانګړي ډول د افغانستان او پاکستان ترمنځ. اخوا چې کوم نوي مسوولین دي او د موضوعاتو په اړه سم چلن نه کوي د هغوی لپاره ډېره ښه وینا ده.»
پر زوره د کډوالو اېستلو له پيلېدو سره پاکستاني چارواکو خبرداری ورکړی وه، که څوک په دې موده کې په خپله خوښه له ياد هېواده ونه وځي، پر زوره به واېستل شي.
د سیاسي چارو کارپوهان دې دريځ ته په پام سره وایي، کابل بايد اسلاماباد پر دوه مخې سياست غلط نه شي؛ ځکه د دوی په خبره پاکستان تل له حالاتو سره خپله لهجه برابره کړې او خپلې موخې يې تعقيب کړي.
د سیاسي چارو کارپوه سرور نیازی وايي:« په دې اړه افغان حکومت باید له ډيپلوماتیکو لارو د پاکستان له حکومت سره خبرې وکړي ترڅو دغه کډوال زیانمن نه شي، په خوندي او باعزته توګه خپل هېواد ته راستانه شي.»
د ملګرو ملتونو او بښنې نړیوال سازمان په ګډون ګڼو هېوادونو او نړيوالو بنسټونو له پاکستان په وار وار غوښتنه کړې، چې د کډوالو د اېستلو په اړه پر خپله پرېکړه له سره غور وکړي، خو پر دې سربېره هم د پاکستان په دريځ کې بدلون نه دی احساس شوی.
