امريکايي چارواکو یو ځل بیا د اسلامي امارت له لوري له شپږم ټولګې پورته د نجونو پر زده کړو د بندیزو پرېکړه وېجاړوونکې بللې او په دې توګه يې افغانستان يوازينی د نړۍ داسې هېواد ياد کړی، چې د خپلو وګړو نيمايي برخه په کې د زدهکړو له حقه حق څخه بې برخې کړی شوې.
د افغانستان لپاره د امریکا ځانګړی استازي توماست وېسټ ویلي:« په بل هېڅ ځای کې د منځنيو او ثانوي پړواونو د زدهکوونکو نیم نفوس له زده کړو بې برخې نه دی. د دوی پر رواني روغتیا، کورنیو، ټولنې او اقتصادي ژوندانه باندې ورانونکې اغیزې لري.»
په ورته مهال د افغانستان لپاره د امریکا شارژدافیرې او د افغان ښځو،ن نجونو او بشري حقونو لپاره د امریکا ځانګړې استازې رینا امیري بیا یو ځل بیا د افغانو نجونو پر مخ د ښوونځیو تړل اندیښمنونکې پرېکړه یاده کړې او په یاده برخه کې يې د خپلې مبارزې د دوام ژمنه کړې.
د افغان ښځو،نجونو او بشري حقونو لپاره د امریکا استازې رینا امیري ویلي:« د طالبانو ظالمانه تګلارې یوازې د افغانستان ستونزه نه ده. دوی خطرناکه بېلګه جوړوي، چې نور یې تقلید کړي او هر چېرې د ښځو او نجونو حقونه وګواښي. د دې ارتجاعې پر وړاندې درېدل زموږ د ټولو دنده ده.»
افغانستان کې د امریکا شارژدافېرې کرن ډیکر بیا ویلي:« افغان نجونې زما لپاره یو لومړیتوب دی. زه د دوی د زده کړو حقونو ترلاسه کولو په برخه به له وکالته ډډه ونه کړم. دا د دوی او افغانستان د راتلونکی لپاره اړینې دي.»
د افغان نجونو پر زدهکړو د لګولي شوي بنديز لرې کولو په تړاو له کراتو غوښتنو وروسته سرپرست حکومت د تل په څېر، یاد بنديز له وضاحت پرته لنډمهالی بولي.
د سیاسي چارو شنونکي بیا په دې باور دي،چې د افغان نجونو پر وړاندې له شپږم ټولګي پورته د ښوونځیو تړل کېدو پر ټولنیز سرخوږي ور اخوا سیاسي ستونزې را ولاړې کړي او اوسنی حکومت یې په پراخه کچه ننګولی دی.
څه باندې دوه کاله وشول، چې د افغان نجونو پر مخ ترامر ثاني پورې له شپږم ټولګي پورته د ښوونځیو دروازې تړل شوي. خو په دې تړاو د نړیوالو له هرې نیوکې وروسته اسلامي امارت دا مسئله کورنۍ بللي او زياته کړې يې ده، چې بهرنيانو په کې د مداخلې په توګه د نظر څرګندولو او دريځ نيولو حق نه لري.
