د اسلامي امارت له لورې په خپره شوې خبرپاڼه کې ویل شوي، چې له څو ورځو راهیسې د اسرائیلو لخوا د فلسطین پر مظلوم ولس سخت بریدونه روان دي، چې له امله زرګونه خلک بې کوره شوي او لا هم ورته ویل شوي چې تر یو میلیون زیات فلسطینیان باید خپل کورونه پریږدي او سلګونه ښځې، ماشومان او سپين ږیري قرباني شوي.
د اسلامي امارت ویاند ذبیح الله مجاهد په خپره کړې خبرپاڼه کې ویلي، د اسرائیلي مشرانو لخوا په رسمي ډول اعلان شوی چې پر فلسطنیانو خوراکي توکي، اوبه، دوا او تیل چې ټول اړین او لومړني انساني توکي بند شي، چې اسلامي امارت دغه ستر انساني وحشت په تر ټولو کلکو ټکو غندي.
خبرپاڼه کې ویل شوي چې اسلامي امارت له فلسطین څخه خپل ملاتړ اعلانوي او له نورې اسلامي نړۍ څخه هم غواړي چې د فلسطینیانو لاسنیوی وکړي او په دې امتحان کې بې تفاوته پاته نه شي.
خبرپاڼه کې وړاندې راغلي، هغه هېوادونه او سازمانونه چې په نورو مستقلو هېوادونو کې د مداخلو لپاره د انساني او بشري حقوقو په ځانګړي ډول د ښځو او ماشومانو د حقوقو له موضوع څخه استفاده کوي، هغوی د فلسطیني ښځو، نارینه و او ماشومانو په ښکاره حق تلفیو او مظلومیت خاموشه دي او یا هم د غاصبینو ملاتړ کوي.
خبرپاڼه کې اسلامي امارت په ټوله نړۍ او په ځانګړي ډول اسلامي هېوادونو او د اسلامي همکاریو پر سازمان غږ کړی، چې د فلسطین قضيې ته ژر تر ژره رسېدنه وکړي او د اسرائیلو د اقداماتو مخه ونیسي.
