د هرات ولایت په زندهجان ولسوالۍ او بادغیس کې د وروستۍ زلزلې د مرګ ژوبلې شمېر لا نه دی وروستی شوی.
اسیايي، اروپايي او اسلامي هېوادونو په جلا جلا خبرپاڼو کې د هرات پېښې له قربانیانو سره خواخوږي څرګنده کړې او د مرستو ژمنه یې کړې.
د ایران بهرنیوچارو وزیر بیا له مولوي امیرخان متقي سره په ټیلیفوني خبرو کې د خواخوږئ ترڅنګ د مرستې او همکاریو ژمنې کړي.
پاکستان او سعودي عربستان هېوادونو د هرات پېښه دردونکې بللې او د مرستو استولو خبر یې ورکړی دی
سعودي عربستان:« موږ په دې ستره غمیزه کې د افغانانو تر څنګ ولاړ یو او تل یې ملاتړ او مرسته کوو.»
د پاکستان حکومت ویلي:« د یوشمېر ادارو مشرانو ګډې ناستې وروسته پرېکړه وشوه چې د افغانستان هرات ولایت زلزله ځپلو سره مختلف توکي مرسته کېږي، چې خوراکي توکي، درمل، خیمې او کمپلې په کې شاملې دي.»
د اروپايي هېوادونو ترڅنګ امریکا ویلي، د هرات پېښه یې ترڅار لاندې ده او ډاډ یې ورکړی چې مرستندویه ادارې د مرستو رسولو په هڅه کې دي.
د امریکا بهرنیو چارو و زیر انټوني بلینکن وايي:« متحده ایالات د افغانستان په شمال لویدیځ کې د پرونۍ زلزلې اغیزې په دقت سره څاري. زموږ بشردوستانه همکاران د افغانستان له خلکو سره د مرستې لپاره چمتو دي.»
کاناډا، چین، قطر، متحده عرب امارات، جاپان، جرمني او یوشمېر نورو هېوادونو هم د خواخوږۍ ترڅنګ د مرستې ژمنه کړې او د هرات له زلزله ځپلو سره یې په نړیواله کچه د همکارۍ او مرستو غوښتنه کړې.
