د طالبانو ویاند ذبیح الله مجاهد وايي چې دوی د اوربند کوم هوډ نه لري.
مجاهد وايي، د تاوتریخوالي کمېدو په تړاو تر اوسه وروستۍ پرېکړه نه ده شوې او په دې تړاو مشورې روانې دي.
د طالبانو ویاند سهیل شاهین ویلي، د اوربند په تړاو به له مشرتابه سره له سلا مشورو وروسته پرېکړه کوي.
شاهین ویلي، د اوربند په تړاو خپاره شوي راپورونه شایعات دي.
تر دې وړاندې اسوشیتد پریس راپور ورکړی و چې د طالبانو مشرتابه منلې چې لس ورځنۍ اوربند کوي.
اسوشیتد پریس خبري اژانس تېر ماښام د ځینو طالب سرچینو په حواله خبر ورکړی چې د طالبانو شورا د قطر دفتر په وړاندیز په ټول افغانستان کې لنډمهالی اوربند منلی دی.
راپور کې د اوربند دقیقه نېټه نه ده په ډاګه شوې او افغانستان کې د اوربند منلو لپاره طالب پلاوی چې پاکستان ته تللی و، تېره ورځ بیرته قطر ته رسېدلی دی.
ویل کېږي، دغه اوربند د زلمي خلیلزاد له مهو غوښتنو څخه و او په دې سره به اوس د طالبانو او امریکا ترمنځ د هوکړه لیک لاسلیک ته زمینه برابره شي.
تمه ده چې بین الافغاني مذاکرات د امریکا او طالبانو ترمنځ د سولې د موافقې تر لاسلیک دوه اونۍ وروسته پیل شي؛ هغه مذاکرات چې د جگړې وروسته د افغانستان برخلیک او په هغه کې د طالبانو رول ټاکي.
ارګ ویلي، تر څو چې بین الافغاني خبرې پیل نه شي، د مرکچي پلاوي نوملړ نه خپروي.
ولسمشرۍ ماڼۍ وایي، د بین الافغاني خبرو لپاره یې ۱۵ کسیز پلاوی چمتو کړی.
له دې سره باور کېږي چې د حکومت او سیاسیونو ترمنځ د کسانو پر سر جنجال د دې لامل شوی چې لا هم له طالبانو سره د خبرو لپاره پر افغان شموله پلاوي هوکړه نه ده شوې.
