کورنیو چارو وزارت وايي، د طالبانو بریدونه زیات شوي خو د امنیتي ځواکونو مرګ ژوبله کمه شوې ده.
ښايي دا به ډیرو ته د حیرانتیا وړ هم وي خو کورنیو چارو وزارت وايي، د تیر کال راهېسې د طالبانو بریدونه دوولس سلنه زیات شوي خو د امنیتي ځواکونو مرګ ژوبله لس سلنه راټیټه شوې ده.
اخوا لومړۍ میرمن او د بشري حقونو ادارې بیا له امنیتي او دفاعي ادارو غوښتي چې ښځو ته ځانګړي روزنیز پروګرامونه جوړ او په امنیتي سکتور کې د دوی ونډه زیاته کړي.
له دفاعي او امنیتي ادارو سره د بشري حقونو په دې ناسته کې خبرې پر دې وشوې چې څنګه په امنیتي سکتورونو کې د ښځو ونډه زیاته او شته ستونزې یې هوارې شي.
لومړۍ مېرمن رولا غني له دفاع او کورنیو چارو وزارتونو غوښتي چې په امنیتي سکتورونو کې د ښځو ونډه زیاته او د شهیدانو کورنیو ته ځانګړي روزنیز پروګرامونه جوړ شي.
د بشري حقونو او د جندر انسجام اداره په امنیتي او دفاعي سکتورونو کې د ښځو اوسنۍ ونډه د قناعت وړ نه بولي او په راتلونکو پنځو کلونو کې د ښځو د ونډې ګراف په زیاتولو ټینګار کوي.
د ملي دفاع او کورنیو چارو سرپرست وزیرانو په دې برخه کې د جدي اقداماتو ژمنه وکړه چې ډېر ژر به عملي شي.
اخوا نړیوال مرستندویان بیا په امنیتي سکتور کې د ښځو پر زیاتې ونډې د ټینګار ترڅنګ له حکومت غواړي چې د ښځو روزنه دې د رهبرۍ تر کچې وکړي او هغوی ته دې د کار خوندي چاپیریال برابر کړي.
