د سولې خبرو لپاره اوربند او له هېواده بهر د طالبانو پټنځایونو له منځه وړل اړین دي.
ولسمشر غني زلمي خلیلزاد ته د امریکا د ولسمشر هغه خبره وریاده کړې چې د سولې د خبرو له پيل سره به د اوربند او بهرنیو هېوادونو کې د طالبانو پټنځایونه له منځه ځي.
ولسمشر غني او د امریکا ولسمشر ډونالډ ټرمپ یوه اوونۍ وړاندې په دې خبرې کړې وې چې د سولې د خبرو لپاره اوربند او د ترهګرو پټنځایونو له منځه وړل اړین دي.
دا چې په اوربند باندې افغان حکومت ټینګار لري، طالبان به له امریکا سره د هوکړې وروسته په دې تړاو پریکړه وکړي.
د افغان سولې لپاره د امریکا د بهرنیو چارو وزارت ځانګړی استازی چې بیا کابل ته راغلی، له ولسمشر غني سره یې د چهارشنبې شپه لیدلي او د سولې روانې پروسې په څرنګوالي یې بحث کړی.
د ولسمشر مرستیال ویاند دوا خان مینه پال وايي، ولسمشر غني زلمي خلیلزاد ته هغه خبرې وریادې کړي چې د دواړو هېوادونو ولسمشرانو په بګرام هوایي اډه او ټلیفوني اړیکو کې کړي دي.
طالبان تراوسه د اوربند په تړاو رسمي څه نه وایي ، په تمه دي چې له امریکا سره هوکړه لاسلیک ، بیا د اوربند او بین الافغاني خبرو په تړاو خبرې وکړي.
د عامو خلکو تر څنګ د ولسي جرګې ځينې غړي هم په تمه دي چې له خبرو وړاندې اوربند به باور لا زیات کړي.
امریکا او طالبان قطر کې د رسمي خبرو د پيل لپاره چمتووالی نیسي، د خبرو بیا پيل د بندیانو له تبادلې وروسته کیږي چې دواړو لورو یوبل نسبي اعتماد کې اخیستي دي.
طالبان ټينګار لري چې خبرې له هغه ځایه پیلوي، کوم ځای چې دریدلې وې.
