د ۲۷ولایتونو د رایو بیاشمېرنې راپور کمیسیون ته وسپارل شو .
د ټاکنو کمېسیون د دارالانشاء ریاست د اوو ویشت ولایتونو د رایو بیا شمېرنې راپور کمشنرانو ته سپارلی چې ډېر ژر به یې پایلې له رسنیو سره شریکې کړي.
له شکایتونو کمېسیون غوښتنه شوې چې د تړلو دفترونو په خلاصولو کې دې د ټاکنو له کمیسیون سره مرسته وکړي او په دې برخه کې له جدیته کار واخلي.
د ټاکنو خپلواک کمیسیون وایې، که ټاکنیز ټکټونه په اوو ولایتونو کې د رایو د بیا شمېرنې اجازه ورنکړي کمیسیون به د اووه ویشتو ولایتونو لومړنۍ پایلې اعلان کړي.
د ټآکنو کمیسیون د دارالانشا ریاست له یوې اوونۍ ځنډ وروسته بلاخره په دې وتوانېد چې د اووه ویشتو ولایتونو د رایو بیا شمېرنې راپور د ټاکنو کمیسیون ته وړاندې کړي.
د ټاکنو خپلواک کمیسیون مشره حوا عالم نورستانۍ وایي، تېره شپه د ټاکنو د دارالانشا ریاست له لوري بشپړ راپور د ټاکنو خپلواک کمیسیون ته ورکړل شوی چې د کمیشنرانو تر ارزونې ورسته به له رسنیو سره شریک شي.
د ټاکنو کمیسیون د دارالانشا رییس بیا د شکایتونو پر کمیسیون غږ وکړ چې د اوو ولایتي دفترونو دروازو په خلاصولو کې دې له ټاکنو کمیسیون سره مرسته وکړي.
هاخوا دولت جوړوونکي ټاکنیز ټیم د ټاکنو د دارالانشا پر ریاست نیوکه کوي چې د ټاکنو خپلواک کمیسیون ته یې د راپور په ورکولو کې ځنډ کړی او کمشنران دې راپور ژر اعلان کړي.
د چهار شنبې په ورځ د دریو ټاکنیزو ټکټونو، ثبات او همپالنې، امنیت او عدالت او سولې او اسلامي عدالت پر یوې خبري ناسته کې د ټاکنو خپلواک کمیسون پر کړنو نیوکه وکړه چې د قانون پر اساس عمل نه کوي، خو د ټاکنو خپلواک کمیسون بیا دا تورونه ردوي او وایي چې قانون ورته سره کرښه ده او پایلې به هم د قانون مطابق اعلانوي.
