واک ته د اسلامي امارت له رسېدو سره سم د اسلاميامارت مشرتابه شیخهبتة الله اخوندزاده د مخکېني حکومت سرتېرو په ګډون ټولو هغو کسانو ته عمومي عفوه اعلان کړه چې شل کاله د اسلامي امارت خلاف درېدلي وو، خو په دغه موده کې د ملګرو ملتونو اړونده ادارې د یاد فرمان د نقض په تړاو راپورونه ورکوي.
د بشر حقونو څار سازمان په خپل راپور کې ویلي، د دوو کلونو راپدېوخوا د اسلامي امارت یوشمېر ځواکونه د تېر نظام سرتیري، پوځیان او د ملي امنیت ادارې پخواني کارکوونکي تر پېژندو وروسته نیسي، بندیاونوي او وژني یې.
راپورکې دغه راز د ملګرو ملتونو د مرستندویه ماموریت (یوناما) د موندنو له مخې، د اسلامي امارت د واکمنۍ څلور لومړۍ میاشتې هغه موده یاده کړې چې په کې د نیونو، صحرایي محکمو او تري تم کېدا تر ټولو ډېرې قضیې ثبت شوي دي.
د راپور یوه برخه:« واک ته له رسېدو وروسته طالبانو د مخکېني حکومت له پولیسو، پوځیانو او د ملي امنیت ادارې له کارکونکو غچ اخېستی او وژنې یې کړې دي. ډېری پوځیان یې تري تم کړي چې له دوو کلونو وروسته لاهم د بشري حقونو نقض دغه کړنې نه دي درېدلي. یوناما موندلې چې د تېر نظام پخواني امنیتي او پوځي سرتیرو د ورکېدا ډېری پېښې واک ته د اسلامي امارت د رسېدو په څلورو لومړیو میاشتو کې ترسره شوي. په دې موده کې له یوناما سره د صحرایي محکمو ۱۴۸قضیې ثبت شوي، خو د ۲۰۲۲ کال د جنورۍ له لومړۍ د دسېمبر میاشتې تر دېرشمې نېټې ۷۰ ورته نورې قضیې ثبت شوي دي.»
د بشري حقونو د څار سازمان په دې راپور کې د اسلامي امارت غړي په غچ اخېستنې، خپلسریو، وژنو او ربونو متهم شوي او سرپرست حکومت دغو قضیو ته په نه رسېدنې او سرسري چلن تورن شوی دی.
د راپور یوه برخه:« د راپور له مخې د طالبانو چارواکي په دې هڅه کې دي چې دغو قضیو ته د شخصي دښمنیو او غچ اخېستنې رنګ ورکړي او په دې سره د پېښو کره شمېرو سره سرسري چلن وکړي. که څه هم دوی ویلي چې له خپلو هغو کسانو سره قانوني چلن کوي چې دغه ډول کړنې ترسره کوي؛ خو هېڅکله یې د خپلو دغو څېړنو پایلې او د مجازات شویو کسانو قضیې نه دي رسنیزې کړي.»
اسلاميامارت د ملګروملتونو بشرحقونو د څار سازمان دغه راپور ردوي او وايي، دا او ورته راپورونه د غلطو سرچینو او مالوماتو پر اساس ترتیب شوي او حقیقت نه لري.
شنونکي دغه راز له حکومته د ورته قضیو جدي پلټنې غوښتنه کوي او په باور یې د ورته پېښو دوام به د ملت او دولت ترمنځ د واټن د رامنځته کېدا لامل شي.
د بشري حقونو د نقض په تړاو د بشر حقونو د څار سازمان دغه راپور داسې مهال ده، چې له دې وړاندې د افغانستان لپاره د ملګروملتونو ځانګړي راپورتر ریچارډ بنیټ او د ملګرو ملتونو اړونده ادارو د اسلامي امارت غړي د عمومي عفوې فرمان په نقض تورن کړي هغه څه چې د اسلامي امارت چارواکو په کراتو رد کړي او ورته راپورونه یې د نړۍوالې ټولنې د دسیسو برخه بللې.
