په ۷ ولایتونو کې د مرکزونو تړلو د ټاکنو پاېلې ځنډولي.
د ولسمشریزو ټاکنو د ترسره کېدو دوه میاشتې پوره شوې خو ټاکنو کمېسیون د دوه ځلې مهالویش د نقض سره سره لاهم د کارونو په برخه کې له جدي ستونزو سره مخ دي.
په اوو شمالي ولایتونو کې د بیا شمېرنې مخه نیول په اوس کې د کمېسیون د کارونو په وړاندې لویه ستونزه ده.
د دارالانشاء رییس حبیب الرحمان ننګ وايي، په کندهار او ننګرهار کې بیا شمېرنه نن بشپړیږی او له هغې وروسته به دوی کمېسیون ته د پایلو د اعلان لپاره عمومي راپور وسپاري.
په اوو ولایتونو کې د بیا شمېرنې پیل ستونزه تر اوسه حل شوې نه ده خو داسې ښکاري چې کمېسیون د دې ولایتونو به غیر لومړنۍ پایلې اعلان کړي.
د ټاکنو کمېسیون کمېنشر اورنګ زیب وايي، په اوو ولایتونو کې دوی په دوو ورځو کې بیا شمېرنه کولی شي او له هغې وروسته به لومړنۍ پایلې اعلان کړي.
بله خوا د ټاکنو نوماند عبدالله عبدالله ګواښ کړی تر څو چې کمېسیون تقلبي رايي باطلې نه کړي دوی ته د پایلو اعلان په هیڅ صورت د منلو نه دی.
عبدالله ویلي، کمېسیون د دولت جوړونکي ټیم تر تاثیر لاندې دی او پریکړه یې ورته مشروعیت نلري.
خو ټاکنو کمېسیون وايي، دوی تر دې دمه خپل ټول کارونه د قانون په چوکاټ کې مخته وړي او د هیچا تر اغیز لاندې نه دي.
