ټاکنو کمیسیون معترضو نوماندانو ته خبرداری ورکړی چې بند مرکزونه پرانیزي.
ټاکنو کمیسیون ګواښ کوي که معتراض نوماندان تړل شوي مرکزونه پرا نه نیزي نو له حکومته به یې پر وړاندې د قانون د تطبیق غوښتنه وکړي .
دغه کمیسیون وايي د۷ ولایتونو د تړل شویو مرکزونو د بیا پرانیستې په موخه یې له نوماندانو سره جدي بحثونه روان دي.
تردې مهاله دنځه ویشتو ولایتونو بیا رای شمیرنه خلاصه شوې چې د شلو بیا شمیرل شوې رایو دانټیک ، سکن او انټري چارې هم پایته رسیدلي دي .
بلخوا دولت جوړونکی ټاکنیز ټیم اعتراض لري چې هغه ټاکنیز ټیمونه چې په ټاکنو کې خپله ناکامي ګوري د قانون خلاف یې په یوشمیر ولایتونو کې د بیا شمیرنې مخه نیولې او د ټاکنو ملي بهیر یې یرغمل کړی دی .
دغه ټیم له ټاکنو کمیسیون او حکومت غواړي چې د رایو د بیا شمیرنې دتړل شویو مرکزونو د پرانستې په موخه دې قانوني اقدامات وکړي .
خو ټاکنو کمیسیون بیا وايي که د تړل شویو ولایتي مرکزونو د بیا پرانستې لپاره یې خبرو پایله ورنه کړه له حکومت به د قانون د تطبیق غوښتنه وکړي .
د ټاکنو کمیسیون دارالانشا رییس حبیب الرحمان ننګ وايي د ۲۷ ولایتونو د بیا شمیرنې او تفتیش له بشپړیدو وروسته د لومړنیو نتایجو راټول شوي مالومات به له کمیشنرانو سره شریک او د کمیسیون له پریکړې وروسته به اعلان شي .
ننګ وايي د پنځه ویشتو ولایتو بیا رای شمیرنه او تفتیش پایته رسیدلی چې له ډلې یې مرکزي ډیټابیس ته د شلو ولایاتو بیا شمیرل شویو رایو د انتقال تخنیکي پړاو هم تکمیل شوی دی .
د ثبات او همپالنې ، سولې او اسلامي عدالت ټیمونو غوښتنه دا ده چې باید درې سوه زره رایې چې د دوی په خبره ناسمې دي باطلې شي، خو کمیسیون وايي دوی د هیڅ افغان رایې د با طلولو صلاحیت نه لري.
تخار ، بدخشان ، جوزجان ، فاریاب ، بغلان ، سرپل او پنجشیر هغه ولایتونو دي چې دټاکنو کمیسیون په خبره دثبات اوهمپالنې ټیم پکې د رایو دبیاشمیرنې مخه نیولې او دفترونه یې ورتړلي .
