ملي دفاع وزارت وايي، ډېر ژر به ختیځ ولایتونه له داعش څخه پاک شي.
ننګرهار کې د داعش د فعالیت ساحه محدوده شوې، خو په بشپړ ډول له منځه نه ده تللې.
ننګرهار اچین ولسوالۍ کې د داعش ډلې د تسلیمدو پروسه چټکه روانه ده او یواځې تېرو درې ورځو کې نږدې دوه سوه داعش وسله وال له کورنیو سره تسلیم شوي، خو له دې سره طالبانو ادعا کړې چې دا ډله یې محاصره کړې وه او افغان ځواکونو ژغورلي، هغه ادعا چې ملي دفاع وزارت یې ردوي.
دفاع وزارت وایي، د پوځ د عملیاتو له فشارونو سره تېره یوه اوونۍ کې سلګونه داعش له کورنیو سره تسلیم شوي چې د ملي امنیت ریاست کې ترې څېړنې روانې دي.
د دفاع وزارت مرستیال ویاند فواد امان داسې وویل (( د طالبانو هغه ادعاوې چې داعش جنګیالي د دوی د فشارونو له امله افغان ځواکونو ته تسلیم شوي بې اساسه دي.))
د ملي دفاع وزارت د مالوماتو له مخې د پوځي فشار او عملیاتو وروسته په تېرو دوه اونیو کې د داعش ډلې شاوخواه شپږ سوه غړي افغان امنیتي ځواکونو ته تسلیم شوي او په ځینو سیمو کې اوس هم فعالیتونه کوي، چې پر وړاندې یې عملیاتونه دوام لري.
ملي دفاع وزارت تمه ښودلې چې ډېر ژر به ختیځ ولایتونه د داعش له حضور څخه پاک او د نورو ډلو پر وړاندې به خپل بریدونه او عملیات زیات کړي.
دفاع وزارت مني چې دا ډله په بشپړ ډول له منځه نه ده تللې، خو د فعالیت ساحه یې محدوده شوې ده.
