ټاکنو کمیسیون د لومړنیو نتایجو د اعلان نیټه بیا وځنډوله.
د چارو د نه بشپړیدو له امله ټاکنو کمیسیون نه شي کولای چې لومړنۍ پایلې سبا د عقرب په درویشتمه اعلان کړي .
کمېسیون هڅه کوي داسې پایلې اعلان کړي چې رڼې او ټولو خواوو ته د منلو وي، خو ځینې ټاکنیز ټیمونه وايي، لومړنۍ پایلې که هرکله اعلان شي دوی یې نه مني .
ټاکنو کمیسیون وايي ترهغې چې د رایو د بیا شمیرنې او تفتیش لړۍ پایته نه وي رسیدلي د لومړنیو پایلو د اعلان نیټه نه شي په ډاګه کولای.
د ټاکنو کمیسیون کمیشنر اورنګزیب داسې وویل ( په یو شمېر ولایتونو کې تر اوسه د رایو بیاشمېرنه نه ده پیل شوې یو شمېر نوماندانو ددغه بهیر مخه نیولې او همدا لامل دی چې د پاېلو نېټه وځنډېده تر څو چې د رایو بیا شمېرنه نه وي بشپړه شوي د ټاکنو پایلې نه شو اعلانولی.))
په ورته مهال سولې او اسلامي عدالت او ثبات او همپالنې ټاکنیز ټیمونه وايي د رایو بیا شمیرنې لړۍ ورته مانا نه لري او لومړنیو پایلو اعلان هم نه مني .
څلورو ولایتونو بامیان ، لغمان ، بادغیس او ارزګان کې د رایو بیا شمیرنه پایته رسیدلې، په شلو نورو کې رای شمېرنه دوام لري، خو بدخشان ، کندز ، بغلان ، جوزجان ، پنجشیر ، پروان سرپل ، بلخ او سمنګان هغه نهه ولایتونه دي چې ثبات او همپالنې ټيم پکې د رایو بیا شمېرنې اجازه نه ورکوي.
له دې سره د ولسي جرګې ځینې غړو د پایلو اعلان باندې ټينګار کړی او اندیښنه یې ښودلې، چې که څومره پایلې ځنډيږی، جنجالونه راولاړولی شي.
د کمیسیون دژمنې پر اساس چې د رایو دبیاشمیرنې او تفتیش بهیر به په یوه اونۍ کې پایته رسوي خو ددغې پروسې له پیله پنځه ورځې اوړي لا یې لومړۍ برخه نه دي شمیرل شوي.
