د اروپايي ټولنې د استازي په ګډون د امریکا، جرمني، ناروې، بریټانیا، فرانسي، ایټالیا او د ملګرو ملتونو استازو د جګړې له ښکېلو غاړو وغوښتل چې افغانستان کې دې تاوتریخوالی کم کړي.
په یوه ګډه اعلامیه کې چې د امریکا بهرنیو چارو وزارت نشر کړې راغلي چې دوی مني چې افغانستان کې د اوږد مهالې ثبات د ټینګښت یوازینۍ لاره د سولې ټینګښت دی.
اعلامیه کې همداراز د افغان حکومت له مشرانو غوښتل شوي چې د سولې پروسې لپاره دې جدي اقدام وکړي او یو هر اړخیز او ټولییز مذاکراتي ټیم دې د سولې رسمي خبرو د پیل لپاره اعلان کړي.
دوی همداراز د سولې مذکراتو پر مهال د اوربند د ټینګېدو غوښتنه کړې ده او د افغان ځواکونو د مرستو پر دوام یې ټینګار کړی دی.
له دې سره قطر کې د طالبانو د سیاسي دفتر ویاند سهیل شاهین پر خپل ټویټر لیکلي، ملا عبدالغني برادر او ورسره هيئت تیر ماښام د افغانستان لپاره د چین ځانګړي استازي ډينګ ژيجون او په قطر کې د چین سفیر سره وکتل.
سهیل شاهین لیکلي، دواړو خواوو په بیجنګ کې د راتلونکې بین الافغاني ناستې او د سولې د پروسې په تړاو خبرې وکړې.
شاهین لیکلي، چین د ملا عبدالغني برادر په مشرۍ د دوی هيئت ته په کنفرانس کې د ګډون بلنه ورکړه.
هغه لیکلي، یاد کنفرانس په مسکو او دوحه کې د شویو کنفرانسونو لړۍ ده او ټول ګډونوال به په شخصي توګه ګډون کوي چې افغانستان کې د ستونزې د حل لپاره شخصي نظریات وړاندې کړي.
بیجنګ د دغې ناستې لپاره له افغان حکومت غوښتی چې خپل استازي ور وپيژني، خو غیر رسمي راپورونه وايي، حکومت له چینايي چارواکو غوښتي چې د ټاکنو د پایلو تر اعلان دې ورته صبر وکړي.
د پاکستان د بهرنیو چارو وزارت د یوې خبرپاڼې په خپرولو سره ویلي، د طالبانو او متحده ایالاتو ترمنځ د خبرو او سولې پروسې د ملاتړ لپاره د چین په ناسته کې ګډون کوي.
دغه ناسته به راتلونکې اوونۍ د چین په پلازمېنه بیجنګ کې جوړه شي چې په کې به د افغان حکومت او سیاستوالو پلاوي ګډون وکړي.
پاکستان ويلي، دغه ناسته کې له افغان سولې د ملاتړ په موخه ګډون کوي.
