افغان حکومت له اوربند پرته طالبانو سره د سولې خبرې نه کوي.
ولسمشر محمد اشرف غني وایي، طالبانو سره خبرو ته تیار دی، خو هغه وخت، چې دغه ډله له تاوتریخوالي لاس واخلي.
ها خوا د امریکا ولسمشر ډونالډ ټرمپ په خپل دریځ د ټینګار سربېره ویلي، چې طالبان به له هغه څه سره مخ شي چې پخوا نه وو مخ شوي.
ولسمشر غني چې ټول تمرکز یې د بلې اونۍ ټاکنو باندې دی په دې شرط طالبانو سره د سولې لپآره تیار دی چې لومړی اوربند وشي.
امریکايي ولسمشر د خپل دریځ په دفاع کې دی او په وار وار یې ویلي، چې د یو غښتلي امریکایي سرتیري او یولس افغانانو په وژنې سره د سولې خبرې له خپل مسیره پاتې شوي دي.
د ډونالډ ټرمپ په وینا دې ډلې پسې هرځای ته ورځي او زیات یې ځپلي دي.
ټرمپ داسې ویلي (( طالبانو انګیرله چې د کابل برید په کولو سره به خپل قوت څرګند کړي خو په حقيقت کې دا د هغوی لخوا يو بې رحمه عمل و او د دوی کمزوري يې وښوده. په تېرو څو ورځو کې مو په هغوی له بل هر وخت ډېر او سخت بريدونه کړي دي او دابه دوام ولري. که طالبان په هر دليل زموږ هېواد ته راشي نو موږ به هر هغه ځای ته پسې ورشو او هغه قوت به يې پر وړاندې استعمال کړو، چې امريکا کله هم نه دی استعمال کړی. طالبان به له هغه څه سره مخ شي، چې مخکې يې نه و ليدلي.))
ټاکل شوې نوې اونۍ کې افغانان د څلورم ځل لپاره ولسمشریزو ټاکنو کې برخه واخلي خو لاهم باور کم کېږي چې ټاکنې به له سولې وړاندې وشي چې په اړه یې بحثونه نن سبا ډېر ګرم دي.
