د ننګرهار خوګیاڼو ولسوالۍ کې تېره شپه د بې پیلوټه الوتکې برید درنده مرګ ژوبله اړولې ده.
د والي ویاند عطا الله خوږیاڼی وايي، برید د خوږیاڼو ولسوالۍ وزیرو تنګي سیمه کې چې تورې بوړې ته څيرمه ده پر داعش وسله والو شوی چې په کې لږ تر لږه شل تنه وژل شوي دي.
برید کې د وژل شویو شلو کسانو جسدونه تر اوسه موندل شوي دي.
برید تیره شپه شاوخوا یوه بجه شوی دی.
د ولسمشر محمد اشرف غني سلاکار جاوید زمان غمشریک بیا وايي، برید په هغو کسانو شوی چې په سیمه کې یې جلغوزي راټولول.
غمشریک وژل شوي شل کسان بیا کاریګر بولي.
د ولایتي شورا غړی اجمل عمر بیا وايي، بې پیلوټه الوتکې برید کې دیرش کسان وژل شوي او څلویښت نور ټپیان دي چې ټول ملکي وګړي دي.
غوڅ ملاتړ ماموریت بیا وايي، د ننګرهار د خوږیاڼو ولسوالۍ وزیرو تنګي سیمه کې د بې پيلوټه الوتکې د برید په اړه څیړنې کوي.
غوڅ ملاتړ ماموریت ویلي، دوی به د ننګرهار ولایت سیمه ییزو چارواکو سره په ګډه څیړنې وکړي چې برید کې چاته مرګ ژوبله اوښتې ده.
