د امریکا ولسمشر ډونالډ ټرمپ خبریالانو ته ویلي چې امریکا اووه زره میله لرې په افغانستان کې جګړه کوي، خو د هند او پاکستان په شمول افغانستان کې د ترهګرۍ پر ضد د یو شمېر هېوادونو جګړه کمرنګه ده.
ټرمپ ویلي چې د داعش خلافت یې سل سلنه له منځه وړی او هغو نورو هېوادونو کې چې داعش سر راپورته کړی؛ هلته هم تر ډېره ځپل شوي دي.
ټرمپ زیاته کړې، فکر نه کوي چې د نورو نولس کلونو لپاره افغانستان کې پاتې شي، ځکه چې داعش یې ځپلی او باید چې هند، ترکیه، روسیه ایران او پاکستان هلته جګړه وکړي.
ټرمپ دا هم ویلي چې سربېره پر دې چې هند او پاکستان افغانستان ته نږدې دي، خو هند هلته هېڅ جګړه نه کوي او پاکستان ډېر لږ په جګړه کې ښکېل دی.
له دې سره ولسمشر غني یو ځل بیا ټینګار کړی، چې هم به سوله راځي او هم به ټاکنې پر خپل وخت کېږي.
ولسمشر غني چې تېره شپه یې د دارالامان ماڼۍ پرانیستې په مراسمو کې خبرې کولې ویلي، اوس هغه وخت تېر شوی چې د افغانانو برخلیک به نورو ټاکلو.
دده په خبره اوس خلک پوهېږي چې څه یې د هېواد په ګټه دي او څه یې په زیان.
نوموړي دا هم وویل چې افغان حکومت د سولې د روانو خبرو له ټولو جزیاتو خبر دی، خو ځکه چوپ دی چې له طالبانو سره یې مخامخ خبرې نه دي پيل کړې.
دده په وینا دوی به د سولې ټول جزیات له ملت سره شریکوي او هېڅ شی به له افغانانو پټ نه ساتل کېږي.
نوموړي یو ځل بیا وویل، چې د افغانانو دښمنان، عام وګړي، مېرمنې، ماشومان او عامه تاسیسات په نښه کوي او افغان ځواکونه یې پر وړاندې هر ډول مبارزې ته تیار دي.
