د کابل ښار اتمې حوزې اړوند رحمان مېنه کې یو ماشوم تر تښتول کېدو وروسته وژل شوی دی.
دولس کلن فیصل د تېرې پنج شنبې په ماښام د خپل کور له مخې نادرکه شو او درې ورځې وروسته یې مړی وموندل شو.
د فیصل پلار ته د پولیسو له لوري ډاډ ورکړل شوی، چې قاتلین نیول شوي دي.
۱۲کلن فیصل د نجم الدین مشر زوی و، چې څلور ورځې وړاندې د خپل کور له مخې تری تم شو، درې ورځې ورسته یې مړی له کور څخه نږدې ۵۰۰ متره وړاندې وموندل شو.
نجم الدین وایي، زوی یې په دومره وحشت وژل شوی و، چې له پېژندلو وتی و.
د وژل شوي فیصل پلار نجم الدین داسې وايي (( پولیسو کوښښ کاوه چې ما صحنې ته ژر ور خوشې نه کړي، نه پوهېږم چې زما د تسلي په خاطر و که بل هدف و، پولیسو یوه څپلۍ را وښوده چې ومې لیده ورته مې وویل چې هو دا زما د زوی فیصل جان څپلۍ ده، خو کله مې چې د خپل زوی جسد ولیده دومره په بې رحمۍ یې وژلی و، چې نه یې مخ پيژندل کېده او نه یې د بدن کوم بل غړی خو یوازې د هغه کالي او څپلۍ مې وپيژندې چې ما ورته ګنډلې او اخیستې وې.))
د فیصل کورنۍ وایي د کابل جنایي امر ډاډ ورکړی، چې د فیصل قاتلین نیول شوي، دوی د فیصل د قاتلینو اعدام غواړي، ترڅو دا ډول پیښې تکرار نه شي.
د فیصل تښتونکو، د فیصل له پلار څخه سل زره ډالر غوښتل، خو د فیصل پلار وایي دی چې یو کوچنی دوکان لري او کرایي کور کې ژوند کوي، نو د دومره پیسو د ورکړې وس یې نه درلوده.
د کابل امنیه قوماندانۍ پېښه مني، خو وایي چې په دې اړه لا څېړنې نه دي بشپړې شوي.
