د فراه ولایت اوسېدونکې وايي جګړه د فراه ولایت تر دروازو رسېدلې خو مسوولین چوپه خوله دي.
جګړه د فراه ښار تر دروازو رسېدلې او هره شپه د طالبانو او افغان ځواکونو ترمنځ نښتو پر ښاریانو خوب آرام کړی دی.
هرات میشتي فراهیان وايي که چیرې دولت د دغه ولایت امنیتي وضعیت ته پام ونکړي نو فراه به یوځل بیا د طالبانو لاس ته ولوېږي.
دوی پر مرکزي حکومت غږ کوي چې فراه ته نور تازه دمی سرتیري او ځواکونه ور ولېږي.
په ورته وخت کې د فراه والي هم دغه ولایت کې نا امنۍ مني خو وايي په دې اړه يې له مرکز سره خپلې غوښتنې شریکي کړې دي .
د فراه اوسېدونکي وايي، طالبان هره شپه د امنیتي ادارو څنګ ته پر امنیتي پوستو بریدونه کوي، د ښار په دروازو کې د خلکو په تلاشي بوخت وي او د ښار امنیت ګواښي.
مدني فعال عبدالناصر فراهي او عبدالرزاق سیفي د فراه د خلکو شورا غړي داسې ویلي (( جګړه د فراه د ولایت تر مقام رسېدلې، جګړه د امنیه قومندانۍ تر دروازې رسېدلې خو امنیتي مسوولین چوپه خوله دي او هیڅ اقدام نه کوي،،، د فراه ښار په منځ کې د طالبانو چک پاینټونه دي خلک تالاشي کوي او حتا ګمرکي عواید را ټولوي.))
دوی وايي، تېرو څلورو کلونو کې په ښار او ولسوالیو کې د طالبانو په بریدونو کې سلګونه امنیتي سرتېري وژل شوي، خو حکومت هېڅ پام نه دی ورته کړی.
یاد کسان وايي، د فراه جغرافيې او جیوپولیټیک موقعیت ته په کتو شته امنیتي تشکیل ورته بسنه نه کوي.
د فراه والي محمد شعیب ثابت هم فراه کې یو لړ امنیتي ستونزې مني، خو ټینګار کوي چې په دې اړه يې خپلې غوښتنې له مرکزي حکومت سره شریکي کړې دي .
د فراه ولایت مدني فعالان وایي، د دغه ولایت ډېری ولسوالۍ د طالبانو په کنټرول کې دي او مرکز کې هم د حکومت د واک کړۍ ورځ په ورځ تنګیږي.
