عامې روغتیا وزارت اعتراف وکړ، چې د ځينو خدماتو په وړاندې کولو کې پاتې راغلی دی.
عامې روغتیا وزارت یو پنځه کلن پلان جوړ کړ چې له مخې به یې خصوصي سکتور ته په دغه برخه کې د خدمت کولو کار اسانه شي.
د عامې روغتیا وزارت د مالوماتو له مخې، ۶۱ سلنه خلک په خصوصي سکتور او پاتې نور په دولتي روغتونونو کې درملنه کوي.
عامې روغتیا وزارت وایي، پخوا به هر کال ۲۸۵ میلیونه ډالر بهرنیو هېوادونو کې په درملنه مصرفیدلې چې اوس دغه کچه ۲۴۱ میلیونه ډالرو ته راټیټه شوې ده.
افغان دولت دومره امکانات نه لري چې د ټولو هېوادوالو لپاره روغتیایي خدمات وړاندې کړي، ځکه خو دغه برخه کې خصوصي سکتور خپل شریک ګڼي.
عامې روغتیا وزارت هڅه کوي د خصوصي سکتور لپاره د اسانتیاو زمینه برابره کړي.
د عامې ورغتیا وزیر فېروزالدین فېروز داسې وویل (( هیڅ دولت نه شي کولی په یوازې ځان خلکو ته خدمات وړاندې کړي، په دې برخه کې د خصوصي سکتور مرسته او همکاري تل حیاتي وه ځکه چې خصوصي سکتور مالي او لوژیستکي امکانات ډېر لري.))
وزیر وایي، د روغتیا ډیری برخو کې پاتې راغلي او نه شي کولی د زړه عملیات، د ګردې او مفاصلو پیوند، پلاستیکي جراحي او داسې نور د لوړې بیې خدمات وړاندې کړي چې په وینا یې دې برخه کې خصوصي سکتور ښه پایله ورکړې ده.
په اوس کې افغانستان ۱۵ قلمه داسې درمل تولیدوي چې د ورادولو لپاره یې هیڅ اړتیا نه شته او د کیفیت له پلوه هم دوی خپله ضمانت کوي.
سږکال افغانستان همدغه ۱۵ قلمه درمل ان افریقا ته هم صادر کړي دي چې دغې برخه کې دا ستره لاسته راوړنه ده.
