قطر کې د سولې د اووم پړاو خبرو کې د بهرنیو ځواکونو د وتلو پر مهالوېش خبرې روانې دي.
ځینو سرچینو ویلي، د تېرو څو پړاوه خبرو برخلیک اووم پړاو خبرې ټاکي او تر ډېره پکې د نورو مسایلو تر څنګ له افغانستان د بهرنیو ځواکونو د وتلو پر مهالوېش خبرې روانې دي.
سرچینې وایي، دغه پړاو خبرې برخلیک ټاکونکې دي او که کومې پایلې ته ونه رسیږي ښایي جګړه نوره هم سخته شي.
قطر کې د طالبانو او امریکا ترمنځ د سولې اووم پړاو خبرې تیره ورځ پیل شوې چې طالبانو ته نږدې سرچینو ویلي، په دې پړاو خبرو کې پر هغو مسایلو خبرې روانې دي، چې په تیرو پړاونو کې
پکې پرمختګ شوی او هوکړې ته نه وو رسېدلي.
د دغو خبرو مهمه برخه یې له افغانستان د بهرنیو ځواکونو د وتلو مهالوېش ټاکل دي.
له دې سره کابل کې د امریکا سفارت وایي، ولسمشریزې ټاکنې دې له طالبانو سره تر سولې کولو وروسته وشي.
کابل کې د امریکا سفیر جان باس وایي، که څه هم ټاکنې او سوله دواړه مهم دي، خو امریکا ته سوله لومړیتوب لري.
جان باس وایي، باید هم مهاله پر دواړو کار وشي، خو په وینا یې امریکا ته سوله لومړیتوب لري.
تر دې وړاندې د امریکا د بهرنیو چارو وزیر مایک پامپيو هم کابل ته د خپل سفر پر مهال وویل چې امریکا تمه لري چې د سپټمبر میاشتې مخکې له طالبانو سره یوې هوکړې ته ورسېږي.
کابل کې د امریکا سفیر جان باس پر افغانانو غږ کړی چې له طالبانو سره د بین الافغاني خبرو لپاره چمتووالی ولري.
په قطر کې د طالب او امریکا د اووم پړاو خبرو په تړاو جان باس وایي، امریکا لا هم نه پوهېږي چې له طالبانو سره به هوکړې ته ورسېږي که نه، ځکه په خبره یې دا طالبانو پورې اړه لري چې څنګه کولای شي د دواړو لورو تر منځ درک رامنځته کړي.
