له غزني ولایت پرته نور په ټولو ولایتونو کې د ولسمشریز ټاکنو لپاره د تقویتي نوم لیکنې بهیر پيل شو.
نن رسماً په ۳۳ ولایتونو کې د ولسمشریزو ټاکنو لپاره تقویتي نوم لیکنه پیل شوه.
دغه بهیر به شل ورځې دوام وکړي او هغه کسان نوم لیکنه کولی شي چې تازه اتلس کلن شوي وي، له مهاجرت راستانه شوي وي او یا یې پخوا نوم لیکنه نه وي کړي.
ټاکنو کمېسیون ډاډه دی چې نړیواله ټولنه ورسره مرسته کوي چې له زماني مهالویش سره سم مخته لاړ شي.
د ۱۳۹۸ کال د ولسمشریزو ټاکنو لپاره رسمآ د تقویتي نوم لیکنې بهیر د جوزا له اتلسمې د سرطان تر اتمې چې ټول شل ورځې کېږي، پیل شو.
ټاکنو کمېسیون وایي، له غزني پرته د ټول هېواد په کچه ۴۵۸ مرکزونو کې تقویتي نوم لیکنه کېږي او په غزني کې بیا عادي نوم لیکنه کېږي.
د رايې ورکولو پر شرايطو برابر هغه کسان په تقویتي نوم لیکنه کې شامل دي چې تازه هېواد ته راستانه شوي وي، یا د ولسي جرګې په تېرو ټاکنو کې له نوم لیکنې پاتې شوي او یا یې هم روان کال قانوني سن اتلس کلنۍ ته رسېدلی وي.
د عامه نوم لیکنې لپاره بیا په غزني کې ۲۴۷ مرکزونه پرانستي دي، خو په ټوله کې د هېواد ټول مرکزونه د جمعې ورځې په ګډون هر سهار له ۷ بجو د مازدیګر تر څلور بجو پرانستي وي او خلک کولی شي نوم لیکنه وکړي خو په یاد مو وي چې د نوم لیکنې پر مهال اصلي تذکره باید له ځان سره ولرئ.
