کابل سره د چین د سولې او پراختیا بنسټ مرسته!
د چین سولې او پراختیا بنسټ د افغانستان سرې میاشتې ټولنې سره د شاوخوا یوسلو دیرش زره ډالرو په ارزښت تړون لاسلیک کړ.
د دې تړون له مخې به کابل ته د را بې ځایه شویو کډوالو پنډغالو ته د دوی د اړتیا وړ توکې چمتو شي.
له دې سره د کډوالو چارو وزارت وایي، تر دې مهاله شاوخوا پنځه سوه زره کډوال را ستانه شوي او یونیم میلیون نور بې ځایه شوي او کډوال شوي دي.
د چین د بهرنیو چارو وزارت مرستیال دا تړون د دواړو هېوادونو د اړیکو د پیاوړتیا لپاره ستر ګام یاد کړ، خو سره میاشت وايي، دا مرستې به یواځې د یو شمېر کډوالو ستونزه حل کړي خو ټولو ته نه شي رسیدای.
د چین د بهرنیو چارو مرستیال وانګ یاجون داسې وویل (( د چین هېواد د افغانستان سره له کلونو راهیسې پراختیایی مرستې کړي او لا به یې پراخي کړي، زموږ د بنسټ لومړی ځل ده چې مرسته یې وکړه خو دا به اخري ځل نه وي او لا به یې ګړندۍ کړو))
کابل ته را بې ځایه شوي کډوال چې د دې هوکړه لیک مراسمو کې یې ګډون کړی و انديښنه وښود چې د ژوند له لومړنیو اسانتیاوو هم بې برخې دي او زیاتو مرستو ته اړتیا لري.
د کډوالو او راستنیدونکو چارو وزارت د معلوماتو له مخې تېر کال ۵۰۰۰۰۰ زره کډوال هېواد ته را ستانه شوي او شاوخوا یونیم میلیون وګړي بې ځایه شوي چې دوی ته د مرستو رسولو او خدماتو چمتو کولو لپاره د مرستندویو ادرو مرستو ته جدي اړتیا لیدل کیږي .
