ګډ امنیتي تړون سازمان(سياېسټياو) د افغانستان او پاکستان ترمنځ د نښتو او روانې سیاسي کشالې په اړه اندېښنه څرګنده کړې او له دواړه لوري یې د ستونزې حل په موخه خبرو ته رابللي.
د دې سازمان سرمنشي وایي، د افغانستان او پاکستان ترمنځ نښتې د اندېښنې وړ دي او نړیواله ټولنه باید په دې برخه کې رغنده سولهییز رول ولوبوي.
تالعتبېک مسادیکوف ویلي، د کابل او اسلاماباد ترمنځ باید نړیواله ټولنه داسې رول ادا کړي چې ستونزې د خبرو له لارې حل کړي.
مسادیکوف زیاته کړې: « موږ د افغانستان او پاکستان ترمنځ د اړیکو خرابېدو له امله ډېر زیات اندېښمن یو. د دې دواړو هېوادونو ترمنځ د اړیکو ناڅاپي ترینګلتیا چې وسلهوالو نښتو ته یې هم لاره هواره کړې، خورا د اندېښنې وړه ستونزه ده. موږ باور لرو چې نور باید دواړه خواوې او همداراز نړیواله ټولنه د اوسني وضعیت د سولهییز حل لپاره ممکنه لاره ولټوي.»
د ګډ امنیتي تړون سازمان چارواکو دغه راز ویلي، دوی لا هم د افغانستان او تاجیکستان ترمنځ د پولې په اوږدو کې جدي څارنه لري او د افغانستان له خاورې د ننګونو او امنیتي مسایلو په اړه جدي غور کوي.
د چارو څارونکي بیا وایي، د افغانستان او پاکستان ترمنځ نښتې د ګډ امنیتي تړون سازمان غړیو هېوادونو لپاره د اندېښنې وړ دي او په خبره یې، که د افغانستان او پاکستان نښتې په پراخې جګړې بدلېږي، نو ټوله سیمه ورسره له سیاسي اړخه بېثباته کېدای شي.
د پوځي چارو شنونکی اسدالله ندیم وايي: « د افغانستان او پاکستان ترمنځ جګړه له سوله ییز او ډېپلوماټیک حل بله لاره نه لري. که د جګړې لاره ونیول شي، دا جګړه اوږدېږي او د دواړو خواوو په زیان ده.»
د ګډ امنیتي تړون سازمان غړي هېوادونو له تېرو نږدې څلورو کلونو راهیسې له بېلابېلو لارو هڅه کوي چې له افغانستان سره نږدې سیاسي او اقتصادي اړیکې وپالي.
د دې سازمان غړي هېوادونه په خپلو څرګندونو کې تل وایي چې له افغانستان سره ښې اړیکې غواړي.
د سیاسي چارو شنونکی ادریس محمدي ځاځی وايي: « زه فکر کوم پر ډیورنډ فرضي کرښې جګړه یوازې د افغانستان او پاکستان موضوع نه ده بلکې هغه بریدونه چې د پاکستان له خوا پر افغانستان کېږي، په دې سیمه کې ټول پراته نظامونه ننګوي، د ټولو پر سیاست او اقتصاد اغېز لري.»
د ویلو ده چې د ګډ امنیتي تړون سازمان په یورو اېشیا کې یو بین الحکومتي پوځي اتحاد دی چې په ۲۰۲۲ کال کې د شپږو هېوادونو ارمنستان، بېلاروس، قزاقستان، قرغېزستان، روسیې او تاجیکستان په غړیتوب سره رامنځته شو.
