د اسلامي علماوو نړیوالې اتحاديې مشر د افغانستان او پاکستان ترمنځ روانه جګړه د اسلامي شعايرو خلاف بللې او زياته کړې يې ده، چې دغه دواړه هېوادونه بايد د جګړې پر ځای يووالی او ګډ دريځ پياوړی کړی.
نوموړی د دې جګړې سملاسي درېدو په اړه پر غوښتنې سربېره پر دې هم ټينګار کوي، چې د دواړو هېوادونو ترمنځ روان کړکېچ بايد د روژې وروستۍ لسيزې له پيل وړاندې پای ومومي او د قطر، سعودي عربستان او ترکیې په منځنګړیتوب دې مذاکرات پیل شي.
د اسلامي علماوو نړیوالې اتحاديې مشر، محیالدین القره داغي په دې اړه ویلي: «د افغانستان او پاکستان ترمنځ جګړه دې ژر بنده شي. د دوو اسلامي هېوادونو ترمنځ جګړه حرامه او د اسلامي روحیې او لارښوونو خلاف ده او په ځانګړي ډول د روژې مبارکې میاشتې د لسو وروستیو شپو له پیل وړاندې دې دغه جګړه ودرول شي. دواړه خواوې دې د قطر، ترکیې او سعودي عربستان په منځګړیتوب خبرو ته کېني او مذاکرات دې پیل کړي.»
بلخوا بهرنيو چارو وزير د روسيې له بهرنيو چارو وزير سره پر ګډو همکاريو سربېره د افغانستان او پاکستان ترمنځ پر جګړې هم غږېدلی. روسيې د يادې جګړې په اړه اندېښنه ښودلې او پر مذاکراتو د ټينګار ترڅنګ يې د ستونزې په حل کې د خپلې همکارۍ ډاډ ورکړی.
د بهرنیو چارو وزارت مرستیال ویاند، ضیا احمد تکل په دې اړه وایي: «په دې غږیزه اړیکه کې مولوي امیرخان متقي د افغانستان پر حریم د پاکستان وروستیو تېریو په اړه د افغانستان موقف شریک کړ او ټینګار یې وکړ، چې که څه هم اسلامي امارت د ستونزو د حل لپاره ډیپلوماټیکو لارو ته لومړیتوب ورکوي؛ خو د خپل ولس د دفاع او خوندیتوب حق خوندي بولي. دغه راز د روسیې د بهرنیو چارو وزیر؛ سرګي لاوروف د سیمې د وضعیت په اړه اندېښنه څرګنده کړه او ټینګار یې وکړ چې ستونزې باید د سیاسي ډیالوګ او خبرو اترو له لارې حل شي. نوموړي زیاته کړه، چې روسیه چمتو ده د کړکېچ د حل په برخه کې مرسته وکړي.»
شنونکي هم د افغانستان او پاکستان ترمنځ د ستونزې په حل کې د روسيې رول مهم ګڼي او زیاتوي، چې منځګړي هېوادونه باید دم لامتۍ ګوته هغه لوري ته نیسي، چې پر افغانستان یې تیری کړی او په روژې کې یې عام افغانان شهیدان کړي.
د سیاسي چارو شنونکی شهزاده مسعود وایي: «روسیه، چین او ټوله اسلامي نړۍ د وروستیو ترینګلتیاوو په حل کې مثبت رول لوبولی شي؛ خو د ملامتۍ ګوته باید هغه چاته ونیول شي، چې جنګ یې شروع کړی، د افغانستان پر حریم یې تعرض کړی او بېګناه خلک یې په شهادت رسولي دي. د پاکستان پوځي رژیم باید لومړی د خپلو کړنو په اړه له افغانانو بښنه وغواړي او بیا د مذاکراتو مېز ته کېني. پاکستان باید د افغانستان په اړه پخپله پالیسۍ کې اساسي بدلونونه راولي تر څو نوو او مثبتو دوه اړخیزه اړیکو ته لاره هواره شي.»
ځينو هېوادونو او نړيوالو سازمانونو پر افغانستان د پاکستان بريد او په کې د ملکي افغانانو په نښه کول غندلي دي. افغان ځواکونو د دې بريدونو پر وړاندې غچ اخيستونکي عمليات پيل کړي، چې د دوام په پايله کې يې پاکستاني ځواکونو ته په لوړه پيمانه مرګ ژوبله اوښتې.
