دامهال په پاکستان کې د امنیتي ستونزو سربېره سیاسي کړکیچ د لا پراخیدو په حال کې دي چې له امله یی شهباز شریف په مشرۍ د ایتلافي حکومت د منحلولو غوښتنه راپورته شوی.
دغه غوښتنه د تحريک تحفظ ايين پاکستان يا TTAP په نوم د حکومت اپوزيسيون کړې او مشر یی وړاندیز کوي چې د اوسني حکومت له منحلېدو سره سم دې د رڼو او ناپییلو ټاکنو ترسره کېدو پورې داسې لنډمهالې حکومت رامنځته کړای شي چې د ټولو ګوندونو استازي پکې موجود وي.
محمود خان اڅکزي دا غوښتنه په پاکستان کې د روانې سیاسي بې ثباتۍ له امله چې دی یی خطرناکه بولي کړې او دغه ناورین یی د حکومت او پوځ له لوري له ګاونډیو سره پر تقابل ولاړو تګلارو پایله بولي.
د پاکستان د اپوزيسيون مشر محمود خان اڅکزی وايي: « له داسې حالاتو سره زموږ اوسنی غیرمنتخب پارلمان مقابله نه شي کولای. د دې لپاره راځئ، چې دا حکومت ختم کړو. د ټولو ګوندونو په شمول دې یو لنډ مهاله حکومت اعلان شي، د ټاکنو نوی کمېشنر دې وټاکل شي او هېواد دې بیا د ټاکنو پر لور ولاړ شي. زموږ شاوخوا وضعیت ډېر خطرناک دی. په کومه اندازه، چې وزیران او جنرالان خبرې کوي، دا د خپلو ګاونډیانو پر ضد د جګړې فضا جوړوي.»
نوموړي د راتلونکي فیبروري په اتمه په پاکستان او خيبرپښتونخوا کې د مسلم ليګ ن په مشرۍ د پاکستان د اوسني حکومت پر ضد د پراخو لاريونو خبره هم کړی.
د چارو څارونکي که څه هم په پاکستان کې سياسي بې ثباتي شديده ګڼي خو زياتوي چې اپوزيسيون ترې د سياسي فشار په توګه استفاده کوي چې خپل مقابل اړخ یې چې اوسنی حکومت دی لا ډېر کمزوری کړي.
د سیاسي چارو شنونکی اخترمحمد راسخ وايي: « هېڅکله هم محمود خان او د محمود خان امثالهم لکه ایمل ولي چې د پښتنو د رهبرۍ دعوې لري دوی د تاریخ په اوږدو کې ونشو کولای د پښتنو د ناخوالو او د پاکستان ظلم او بربریت پر وړاندې په ځغرده ودرېږي.»
ځيني نور شنونکي بیا د محمود خان اڅکزي په مشرۍ د اپوزيسيون غوښتنه چې د حکومت منحلېدو په اړه يې کړې، معقوله ګڼي او زياتوي هلته د حکومت له بدلون سره دا امکان شته چې د پاکستان پر سياست د پوځ اغېز کمزوری کولو هڅه هم وشي.
د دوی په باور د پاکستان په سياست کې د پوځ نقش کمزوري کولو هڅې په حقيقت کې په سيمه کې د ثبات له ټينګښت سره مرسته ده.
د سیاسي چارو شنونکی محمد اسماعیل ځدراڼ وايي: « د پاکستان دولت اداره که له منځه ځي او دغلته بله اداره جوړېږي دا بیا ډېره ښه ده، د دغې سرطان له دانې څخه ټول ګاونډیان په امن شي او کومې ناسمې تګلارې چې دوی لري دغه به له منځه ولاړې شي او ستونزې به ورسره حل شي.»
دا په داسې حال کې ده، چې د پاکستان د شخړو او امنيتي مطالعاتو انسټېټيوټ د وروستي راپور له مخې په خپله پاکستان، قبايلي سيمو، خيبرپښتونخواه او بلوچستان کې تېر کال ناامني ۲۶ سلنه زياته شوې.
په دغه راپور کې وړاندوينه شوې وه که پاکستان پر خپلو سياستونو غور ونکړي نو راتلونکي کې به د لا زیات سخت حالت سره مخ شي.
