د کندهارښار لومړۍ ناحیه کې د افغانستان د پخواني امپراتور احمدشاه ابدالي کور تازه د اطلاعاتو او فرهنګ وزارت له خوا په خپل پخواني سبک ترمیم او د سې شنبې په ورځ(د مرغومي ۱۶ مه) د سیلانیانو پر مخ پرانستل شو.
د هېواد اطلاعاتو او فرهنګ وزارت چارواکي وایي، د احمدشاه بابا کور د ۱۷میاشتو په موده کې د ۱۷.۵میلیونه افغانیو په لګښت د اطلاعاتو اوفرهنګ وزارت په انکشافي بودیجې رغول شوی او ګټه اخیستنې ته وسپارل شو.
د پروژې انجینرلطف الله اسماعیل زاده وايي: « د احمدشاه بابا کور په پيل کې د معمارۍ په بخارايي سبک جوړ شوی و او موږ بریالي شوو چې بېرته یې په هماغه سبک ورغوو. دا کور مو نن ګټه اخیستنې او دولت ته د سپارلو لپاره چمتو کړی. دا پروژه په ۱۷ کاري میاشتو کې بشپړه شوه چې ۱۷.۵ میلیون افغانۍ لګښت پرې راغی او د افغاني انجینرانو له خوا یې کارونه پرمخ وړل شوي.»
د هېواد د اطلاعاتو او فرهنګ وزارت مسوولین بیا وايي، د اسلامي امارت له بیا ځل راتلو سره په کندهار کې شپږ تاریخي آبدې رغول شوې او اوس هم د ۳۰۰ میلیونه افغانیو په لګښت په نهو ولایتونو کې ۲۸ تاریخي اثارو رغول تر کار لاندې دي.
دوی وايي، هڅه کوي هغه ټول تاریخي میراثونه بېرته ترمیم او وساتي چې له منځه تللو کواښ سره مخ وي.
د اطلاعاتو او فرهنګ وزارت مالي او ادارې معین قدرت الله جمال وايي: « دا که دلته وي، که هرات، غزني یا بل ولایت کې، زموږ د تاریخي ابدو ریاست ژمن دی چې دا اثار وژغورو، ترڅو زموږ نوی نسل له خپل تاریخ خبر شي.»
د اطلاعاتو او فرهنک وزارت د تاریخي ابداتو بیارغونې او ساتني رییس انجنیرمحمدحسیب نسیمي وايي: « د تاریخي ابداتو ریاست ژمن دی چې د هېواد د ټولو تاریخي اثارو د ساتنې لپاره کار وکړي. روان کال د هېواد په ۸ یا ۹ ولایتونو کې ۲۸ تاریخي ابدې تر کار لاندې لرو.»
په ورته وخت کې د کندهار اوسېدونکي هم د دې اقدام هرکلی کوي، خو زیاتوي چې تاریخي ابدو ته باید له پخوا څو چنده پاملرنه زیاته شي او یاد ولایت کې نور تاریخي ځایونه او ابدې هم ورغول شي.
هغوی غوښتنه کوي چې یاد تاریخي ځایونه او ابدې باید تر بیا ترمیم او جوړونې وروسته، د سیلانیانو د لیدو لپاره پرانستې وي، ترڅو خلک ور څخه لیدنه وکړي او له پخواني تاریخ څخه باخبره شي.
تاریخ پوه حیات الله رفیقي وايي: « دا باید څوک ونه وايي چې څومره اهمیت لري، دا د افغانستان هویت دی. دلته یوازې د احمدشاه بابا کور نه دی بلکې ډېر نور تاریخي ځایونه هم لرو چې باید توجه ورته وشي، ترڅو د افغانستان تاریخ بېرته راژوندی شي.»
د پوهنتون استاد انجینرشېرشاه رشاد وايي: « دا ډول تاریخي ځایونه باید ۱۲ ساعته د سیل کوونکو پر مخ خلاص وي، ترڅو زموږ خپل خلک او بهرنیان زموږ پخوانی تاریخ په خپلو سترګو وګوري.
د پخواني امپراتور احمدشاه بابا کور چې بنسټ یې شاوخوا۳۰۰ کلونه مخکي د کندهار له نوي ښار سره اېښودل شوی و، تردې مخکې د ورښتونو او نه پاملرنې له کبله د نړېدو له ګواښ سره مخ و.
د کندهار اطلاعاتو او فرهنګ ریاست مسوولین وايي، د احمدشاه بابا کور ته نږدي د نورو تاریخي کورونو ترمیم به هم په راتلونکي کې ترسره شي.
