وزلوبه د افغانستان یوه له ملي او دودیزو لوبو څخه ده چې نه یوازې په کـــور دننه بلکې د سیمې او په تېره بیا د منځنۍ اسیا هـــــــــېوادونو کې خورا زیات مینه وال لري. دغې تاریخي او ورزش پالې لوبې په وروستیو کلونو کې د هېواد د بېلابېلو قومونو ترمنځ د یووالي او ورورګلوۍ شعار هم په حقیقت بدل کړی.
د وزلوبې لــــیګ د اووم پړاو سیالۍ په کابل کې ترسره شوې چې د ډېرو مینه والو په وینا، د سرپل لــــوبډله په کې له پیله ښه وځلیده او په زړه پورې لوبې یې وکړې.
د ســــرپل چاپه اندازان وتوانېدل چې خپلو ټولو سیالیو لوبډلو ته په ماتې ورکولو سره، پای لـــــوبه کې د بدخشان په وړاندې میدان ته ووځي او په پوره مهارت سره خپله لوبډله اتلولۍ ته ورسوي.
که څه هم په کابل کې د وزلوبې لیدونکو هم د سرپل لوبډله د لاسونو په پړکـــــــولو سره بدرګه کړه، خو سرپل ولایت ته د لوبډلې په رسېدلو سره د خلـــــــــکو خوښي د لیدو وړ وه.
د سرپل ولایت اوسېدونکو چې د لــــــوبډلې هرکلي لپاره راوتلي وو، دا یوازې یوه ورزشي بریا نه بلکې د ټول ولایت لپاره د ویاړ او یووالي نښه وبلله.
د دوی په وینا، وزلوبه کولی شي د خلکو ترمنځ د سالمو سیالیو دود پیاوړی کړي او د هېواد د ملي لوبو ارزښت ژوندی وساتي.
د ســـــرپل اوسېدونکی سیف الله وايي: « وزلوبه ډېره اوږده مخینه او تاریخ لري. دا لوبه سبب کېږي چې زموږ د هر قوم خلک په یوه ځای سره راټول شي.»
د سرپل اوسېدونکی ذبیح الله فیضي وايي: « موږ د خپل تیم په ترکــــــیب کې د هر ولایت چاپندازان لرل او دا یې څــــــرګندوله چې موږ له ګاونډ ولایتونو سره همدلي لرو. زه د دې اتلولۍ ګـــټلو مبارکي هغو ټولو کسانو ته وایم چې د دې ډول خوښیو تږي دي.»
بله خوا، د وزلوبې یو شمېر لوبغاړي له سږنیو سیالیو خوښي څرګندوي او وايي، که زمینه ورته برابره شي، نو افغان لوبغاړي د دې وړتیا لري چې بهرنیو هېوادونو کې هم لوبې وکړي.
چاپنداز حاجي محمد وايي: « دلته باید چاپندازانو او پهلوانانو ته ورزشي کلب جوړ شي، ترڅو دغه ورزش ته تازه راغلي ځوانان ښه و روزل شي. که دوی ته سم تمرین ورکړل شي، له بهرنیو لوبغاړو ښه لوبه کولی شي.»
چاپنداز عوض شېرپور وايي: « په لومړي سره کې د افغانستان ټولو خلکو او بیا د سرپل خلکو ته مبارکي وایم. دا پهلوانان د هر ځای لیاقت لري، که زموږ د ټیم همداسې ملاتړ وشي، ژمنه کوو چې د اسیا په کچه به اتلولي وګټو.»
په ورته مهال، د سرپل ولایت د بدنې روزنې او ورزش مسوولین ډاډ ورکوي چې د وزلوبې لوبغاړو ته به د ظرفیت لوړولو ترڅنګ له هېواده بهر هم د لوبو زمینه برابره کړي.
د سرپل ولایت د بدنې روزنې او ورزش آمر عبدالحق فیضي وايي: « زموږ تعهد هم همدا دی او د ولایت ټول ورزشي مسوولین او د وزلوبې څانګه د وزلوبې له ټیمونو ملاتړ کوي. همدارنګه موږ هڅه کوو چې دا لوبه په ټولو ولایت او ولسوالیو کې وده وکړي او وکولی شو د افغانستان د وزلوبې ملي ټیم ته ښه لوبغاړي ورکړو.»
د یادونې وړ ده چې د وزلوبې اووم پړاو سیالۍ کابل کې د هېواد د ۱۲ لوبډلو ترمنځ وشوې چې په کې یو شمېر بهرنیو لوبغاړو هم ګډون کړی و او دغه راز، د یو شمیر هېوادونو ډېپلوماټان هم د لوبو لیدلو ته ورغلي وو.
