کندهار کې د نورو ولایتونو په څېر ځينې سیمه ییزې لوبې او د تفرېح میلې شته چې یوه یې په ډنډ ولسوالۍ کې د موټرو ځغاسته ده.
د دې ولـــــــــــسوالۍ په رېګونو کې هره جمعه د موټرونو ځغاستې سیالۍ کېږي او د ماښام تر ناوخته دوام کوي.
د سیمې اوسېدونکي وايې، دې سیالیو ته اوس له نورو ولایتونو او لرې سیمو هم خلک د سیل او تفرېح لپاره راځي.
د کندهار اوسېدونکی عبدالواحد اغا وايي: « دې ځای ته رېګستان وايي، دلته د کندهار خلک راځي او دا غټ موټران راولي او د موټر ځغلولو مېله کوي. همدارنګه ځینې کسان حتا د شپې له مخې هم دلته وي، د پخلي توکي له ځانه سره راوړي او دلته پرې مېله جوړوي.»
د کندهار اوسېدونکی محمد صادق وايي: «دلته هره جمعه ډېر خلک راځي او مېله کوي. معمولا ً د ځغلولو لپاره ګران بیه او قوي موټر کارول کېږي.»
د کندهار اوسېدونکی شریف الله وايي: «اوس دا ځای د خلکو په ژمني مېله ځای بدل شوی. دلته ډېر کسان د ځغاستې موټران راولي، خپله هم ساتېري کوی او د نورو هم سات ورتېروي.»
په دې سیالیو کې له ډېرو ګران بیه موټرو لکه لنډ کروزر، فراډو، لکسېس، فورنر، فورټینر او نورو پیاوړو موټرو کار اخیستل کیږي.
د موټر ځغاستې مینه وال محمد صادق وايي: « دلته د کندهار خلک د جمعې په ورځ د موټر ځغلولو مېله کوي. په دې موټرو کې فرونر، صرف، پراډو او نور ګرانه بیه موټر کارول کېږي.»
یو بل مینه وال سیف الرحمن وايي: « په دې موټر کې د ۳ میلیونه، ۳ میلیونه او ان ۵ میلیونه پورې بیه لرونکي موټر شته؛ ځکه دې رېګستان ته کمزوري موټر نه شي راتللی او هغه موټر چې سیالي کوي، دا نو بیا باید قوي وي.»
د کندهار ډېری اوسېدونکي د ارغنداب ولسوالۍ باباولي زیارت، د شاه ولیکوټ ولسوالۍ د دهلې بند، د خاکریز ولسوالۍ د شاه اغا زیارت او ګڼو نورو ځایونو ته د تفریح لپاره ورځي، مګر سږ ژمی په ډنډ ولسوالۍ کې د موټرو د دې سیالیو مېلې ته هم ډېر خلک ورمات دي.
