د هرات سیمهییز چارواکي وایي، صنعتکارانو ته د اسانتیاوو برابرولو لپاره به ډېر ژر د دې ولايت په صنعتي ښارګوټي کې د ځمکو وېش لړۍ پیل شي.
چارواکي ټینګار کوي چې د صنعتي ښارګوټي د پراختیا او کورنیو تولیداتو د ودې هڅې روانې دي او له صنعتکارانو غواړي چې د تولیداتو کیفیت نور هم لوړ کړي.
هرات والي نوراحمد اسلام جار وايي: « ځمکه، اوبه، برېښنا، ګاز او امنیت هغه عناصر دي چې د صنعت لپاره خورا ډېر ارزښت لري. موږ هڅه کوو چې د یوه کال په اوږدو کې دا هرڅه تضمین او ارزانه کړو.»
صنعتکاران د هرات په صنعتي ښارګوټي کې د ځمکې کموالی د پانګونې پر وړاندې یوه اساسي ستونزه بولي او له حکومت غواړي چې د ځمکو پر وېش او د برېښنا پر برابرولو سربېره دې هېواد ته د مشابه توکو د واردولو مخه هم ونيسي.
د هرات صنایعو او کانونو خونې رییس عبدالناصر امین وايي: « موږ د صنعتي ښارګوټي لپاره پرېمانه دښتې لرو، ځمکې باید هرڅومره ژر چې کېږي صنعتکارانو ته ووېشل شي. که موږ په لږې ځمکې څلور یا پنځه پوړه ودانۍ جوړوو او بیا په دې ودانیو کې صنعتي فعالیت کوو، دا زموږ مصارف او د انرژۍ لګښت ډېروي.»
صنعتکار عبدالله دایان وايي: « د ځای په لحاظ ستونزې لرو، له چارواکو غوښتنه کوم چې ماته لږ ځمکه راکړي، ترڅو د خامو موادو او ګودام لپاره په کې ځایونه جوړ کړم.»
بله خوا شنونکي وایي، صنعتکارانو ته د پانګونې زمینې پراخول کولی شي په نږدې راتلونکي کې افغانستان ځان بسیاينې ته نږدې کړي.
د پوهنتون استاد غلام فاروق ندیم وايي: « د هېوادونو او ښارونو اقتصادي پراختیا طبعا ً د صنایعو په پراختیا پورې اړه لري. کله چې خام مواد په صنعتي موادو بدل شي، دا د یوه هېواد لپاره لویه شتمني ده او ګڼو کسانو ته په کې د کار کولو زمینه هم برابرېږي.»
د هرات ځايي چارواکو په خبره، په پام کې ده چې هرات کې پر۴۶ زره جریبه ځمکې يو بل لوی صنعتي ښارګوټی هم جوړ شي.
