د کرېکټ ملي لوبډلې د پخواني لوبډ لمشر اصغر افغان په غوښتنه بلخ کې د تازه راستنو شویو کډوالو لپاره د ځمکې په پلور کې تخفیف ورکړل شوی.په دې ولایت کې د شهرنو ښار ګوټي مسوولین وايي، د کرېکټ برخې هېواد ته ډېر ویاړونه راوړي او دا يې حق دی چې غوښتنه يې ومنل شي.
د دوی په خبره، تازه راغلي کډوال له سختو اقتصادي ستونزو سره مخ دي او دوی له همدې امله دا غوښتنه منلې.
د شهرنو پروژې مسوول سید عقیل بلخي وايي: « زموږ هغه مهاجر هېوادوال چې هېواد ته راستنېږي، د هغوی د لاسنیوي لپاره په ټولو معاملاتو کې ۲۵ سلنه تخفیف په پام کې لرو. زموږ هغه هېوادوال چې له ګاونډیو هېوادونو بېرته خپل هېواد ته راځي، که د مزارشریف د نوي ښار په پروژه کې د استوګنیزو نمرو غوښتنه وکړي، کولی شي د مهاجرت له اسنادو سره په مزارشریف ښار کې زموږ مرکزي دفتر ته راشي، ترڅو موږ ورسره همکاري وکړو.»
له بلې خوا، د بلخ ولایت د کډوالو او راستنېدونکو چارو ریاست مسوولین وایي، د راستنو شویو لاسنیوی پر سرپرست حکومت سربېره د ټولو خلکو مسوولیت دی چې تر خپلې وسې ورسره همکاري وکړي.
د بلخ ولایت د کډوالو او راستنېدونکو چارو ریس اسدالله وفا وايي: « سوداګرو د راستنېدونکو کډوالو لپاره موږ سره نغدي، خوراکي او غیر خوراکي مرستې کړې. موږ بار بار پر دوی غږ کړی او دوی هم هر ځل لاسنیوی کړی. موږ بیا هم غږ کوو چې مهاجرین بېوزله خلک دي، ستونزې یې ډېر دي؛ ځکه په پاکستان کې د دوی کورونه او شتمني چور شوي او تش لاس هېواد ته راستانه شوي. دوی په هره برخه کې مرستو ته اړتیا لري، موږ بیا هم غږ کوو چې په دې برخه کې همکاري وکړي.»
په ورته مهال، له پاکستانه راستانه شوي کډوال د شهرنو ښارګوټي د مسوولینو د هغه ګام هر کلی کوي چې د اضغر افغان په غوښتنه یې دوی ته د ځمکو او کورونو په ورکړه کې تخفیف اعلان کړی.
د دغو کډوالو په خبره، ستونزې به یې هغه وخت حل شي چې د کار زمینه هم ورته برابره شي.
له پاکستانه بلخ ته راستون شوی کډوال وايي: « دوی که دا ځمکه له تخفیف سره راکړي یا حتا وړیا یې راکړي، زه یې د آبادولو وس نه لرم. که داسې یو پروګرام ونیول شي چې د سرپناه په توګه یو انګړ، دوه کوټې او تشناب موږ ته جوړې شي، بیا یې که په قسط هم موږ ته راکړي ښه خبره ده.»
له پاکستانه یو بل راستون شوی وايي: « موږ له ملي سوداګرو او شتمنو خلکو غواړو چې له راستنو شویو کډوالو سره مرسته وکړي. که دوی دلته پانګونه وکړي، هم به دا خلک کار پیدا کړي او هم به دوی پیسې وګټي.»
د یادونې وړ ده چې د روان لمریز کال له پيله بلخ ولایت ته نږدې یو نیم زر کورنۍ له پاکستانه راستنې شوې دي چې څه موده وړاندې د ریاست الوزرا د ادارې مرستیال له لوري ورته د ښارګوتي د نومرو وېش هم پیل شو.
کډوال پر کور دننه پر یادو مرستو سربېره د کاري زمینود برابرېدو غوښتنه کوي او وايي، د کار موندلو له درکه به پر ځان بسیا شي او پر ټولنې به بار نه وي.
