د روسیې په کوربه توب د کازان په جوړېدونکې ناسته کې د اسلامي امارت له لوري د صنعت او سوداګرۍ وزارت سرپرست نور الدین عزیزي پر مشرۍ د پلاوي د ګډون خبر ورکړل شوی.
د روسيې ټاس خبري اژانس په افغانستان کې د یوې سرچینې له قوله ویلي، دغه پلاوی به په ټاکلې نېټه د کازان په ناسته کې ګډون وکړي.
ټاکل شوې د کازان شپاړلسم نړیوال اقتصادي فورم ناسته د مې میاشتې له ۱۳مې تر ۱۸مې نېټې په کازان ښار کې جوړه شي او اصلي تمرکز به يې په ګډونوالو هېوادونو کې د اقتصادي سیسټم پر ډیجیټلي کېدو او د همکاریو پر فرصتونو ورټول وي.
د ټاس خبري آژانس د راپور یوه برخه: « یوې افغانې سرچینې ټاس ته ویلي چې افغانستان به یو مهم استازی او پلاوی د کازان فورم ته ولېږي. اټکل کېږي چې د دې پلاوي مشري به د سوداګرۍ وزارت سرپرست نورالدین عزیزي وکړي. دې پلاوي کې به د کرنې او انرژۍ وزارتونو چارواکي هم شامل وي. د سفر پر مهال پلان شته چې د روسیې او افغانستان تر منځ د همکارۍ لپاره نوي فرصتونه ولټول شي.»
له دې وړاندې د افغانستان لپاره د روسیې ځانګړي استازي ضمیر کابلوف هم ویلي و چې د کازان فورم په څنډه کې به د افغاني تولیداتو یو ځانګړی نندارتون هم پرانیستل شي.
د سرپرست حکومت چارواکو په دې غونډه کې د پلاوي د ګډون یا نه ګډون په تړاو زموږ پوښتنې ځواب نه کړې، خو د نړیوالو اړیکو یو شمېر شنونکي د پلاوي ګډون خبره ځکه هیله بښوونکې بولي چې د دواړو هېوادونو ترمنځ هراړخیزې اړیکې باوري کوي او د دواړو هېوادونو استازو ته زمینه برابروي چې هراړخیز مسايل مخامخ مطرح کړي.
د نړیوالو اړیکو شنونکی نجیب الرحمان شمال وايي: « زه هیله لرم د سرپرست حکومت چارواکي یا د هغوی استازي چې په دې کنفرانس کې ګډون کوي، وکولی شي د افغانستان د خلکو علیا ګټو په نظر کې نیولو سره، د نړیوالې ټولنې او په ځانګړې توګه روسیې د ملاتړ په جلبولو سره د ستونزو هوارولو او د افغانستان له خلکو د ملاتړ په برخه کې ښه ګټه پورته کړي.»
ځیني نور بیا دغه ډول ناستې د سرپرست حکومت لپاره د سیمه ییز اتصال او اقتصادي پرمختګ فرصت ګڼي او ټینګار کوي چې ياد هدف ته د رسېدو لپاره بايد ترې ګټه پورته شي.
د سیاسي چارو شنونکی اسلم دانشمل وايي: « افغانستان په سیمه کې له ځانګړې اهمیت برخمن دی. دغه اهمیت ته په کتو سره موږ باید له دغو فرصتونو سالمه استفاده وکړو، ډېره استفاده وکړو، ترڅو د افغانستان د معضلې حل له همدغو مسایلو سره را ووځي.»
د کازان په ناسته کې د سرپرست حکومت د پلاوی ګډون په اړه له هغې وروسته خبر ورکول کېږي چې موده وړاندې د روسیې سترې محکمې د دې هېواد د لویې څارنوالۍ له خوا د طالبانو پر تحريک د بندیز ځنډولو غوښتنه ومنله.
