د بهرنیو چارو سرپرست مولوي امیر خان متقي قطر ته د خپل سفر پر مهال، د دې هېواد له بهرنیو چارو وزیر سره د اړیکو پراختیا، دوه اړخیزو همکاریو او سیمه ییزو موضوعاتو په اړه خبرې کړې.
د بهرنیو چارو وزارت مرستیال ویاند وایي، په دې لیدنه کې مولوي امیرخان متقي د کابل او دوحې ترمنځ اړیکې مثبتې ګڼلې او د دواړو هېوادونو ترمنځ یې د ډیپلوماټیکو اړیکو د پراخېدو غوښتنه کړې.
د ضیا احمد تکل په خبره، مقتي د قطر بشري مرستې ارزښتمنې بللې او له دوحې یې د دغو مرستو د دوام غوښتنه کړې.
تکل په دې اړه وايي: «د افغانستان اسلامي امارت د بهرنيو چارو وزير محترم مولوي امير خان متقي په دوحه کې په بهرنيو چارو کې د قطر د دولت وزير محترم محمد بن عبدالعزيز الخليفي وکتل. په دې ناسته کې دواړو لوريو پر دوو اړخيزو اړيکو، مختلفو برخو کې د همکاريو پراختيا او ځينو سيمه ييزو مسايلو خبرې وکړې. محترم مولوي امير خان متقي پراختيايي او بشري برخو کې افغانستان سره د قطر مرستې ارزښتناکې وبللې او د افغانستان حکومت له اړخه يې د همکارۍ ډاډ ورکړ. بهرنيو چارو کې د قطر د دولت وزير هم افغانستان سره د خپل هېواد اړيکې نږدې وګڼلې او د دواړو هېوادونو ترمنځ يې د همکاريو د پراختيا پر ګڼو برخو رڼا واچوله.»
په ورته وخت کې، د سیاسي چارو یو شمېر شنونکي قطر له لوېدیځو هېوادونو او نړیوالې ټولنې سره نږدې هېواد بولي او زیاتوي، له دې هېواد سره د اړیکو پراختیا، له سیاسي انزوا د اسلامي امارت د ایستلو ترڅنګ د افغانستان نړیوال حضور زیاتولی شي.
پخوانی ډېپلومات عزیز معارج وايي: « قطر له افغانستان سره ښې اړیکې لري، زموږ په چارو کې یې منفي مداخله نه ده کړې او دغه راز له امریکا، آسیايي هېوادونو، چین، سیمه ییزو او عربي هېوادونو سره هم ښې اړیکې لري. نو که چېرې د اسلامي امارت له خوا قطري چارواکو ته قناعت ورکړل شي، افغانستان ته د نړۍ مرستې را جلبولی او له نړۍ سره د افغانستان اړیکې ښې کولی شي. په دې سره د افغانستان ډېری ستونزې، نه یوازې سیاسي بلکې له هوايي لارې تجارتي اړیکې هم ټینګېدلی شي. په ټوله کې، له قطر سره د اړیکو پراختیا د افغانستان پر ګټه ده.»
ځینې نور بیا له قطري چارواکو سره د متقي لیدنه د اسلامي امارت او نړیوالې ټولنې ترمنځ د اړیکو د پراختیا لپاره مهمې بولي، خو ترڅنګ یې له سرپرست حکومت غواړي چې د رسمیت پېژندنې لپاره دې د خلکو مشروع غوښتنې ومني.
د نړیوالو چارو شنونکی سمیر انګار وايي: « قطر د اسلامي امارت او نړیوالو ترمنځ مهم منځنګړی دی. دا هېواد هڅه کوي چې د سیاسي تعامل، بشري مرستو او اقتصادي ملاتړ له لارې د اسلامي امارت لپاره نړیوال ذهنیتونه نرم کړي، مګر له بده مرغه لاهم ځینې محدودیتونه شته او تراوسه پورې نړیوال مشروعیت ترلاسه شوی نه دی.»
دا په داسې حال کې ده چې د ملګرو ملتونو امنیت شورا د بندیزونو کمېټې له قطري چارواکو سره د مولوي امیرخان متقي د لیدنې لپاره پر نوموړي د روان کال د اپریل له ۲۷مې تر مې ۴مې نېټې د سفر محدودیتونه لغوه کړې دي.
