د روغتیا نړیوال سازمان په خپل تازه راپور کې په هېواد کې د تنفسي ناروغیو له امله د مړو شويو ناروغانو نوې شمېرې خپرې کړې دي.
راپور کې ویل شوې، په تېره فبرورۍ میاشت کې د دغې ناروغۍ له امله ۳۵۰ کسان مړه شوې چې د تېرو میاشتو د شمېرو پرتله ۱۶.۷ سلنه کموالی ښيي.
په دغه راپور کې د تنفسي نارغيو د شمېر کموالي لامل، د هوا ګرمېدل او د واکسین د تطبیق په اړه د عامه پوهاوي د کچې لوړېدل ښودلي.
د راپور یوه برخه:« په تېره فبرورۍ میاشت کې ۳۵۰ تنه د بېلابېلو تنفسي ناروغیو له امله مړه شوې. د روان کال د جنورۍ پرتله په تنفسي ناروغیو د اخته کسانو په شمېر کې ۱۶.۷ سلنه کموالی راغلی دی.»
په ورته وخت کې د عامې روغتیا وزارت مسوولين بیا په تېره مياشت کې د تنفسي ناروغيو له امله د مړو شويو کسانو دا شمېرې تاییدوي او له ټولو وګړو غواړي چې د تنفسي ناروغيو د درمنلې په موخه دې روغتيايي مرکزونو ته مراجعه وکړي.
د عامې روغتیا وزارت ویاند شرافت زمان امرخېل وايي:« د ژمي موسم په رارسېدو سره اکثریت د تنفسي سیسټم اړوند ناروغانو ګراف په سړو سیمو کې پورته کېږي. بدبختانه سږ کال هم له موږ سره د تنفسي ناروغانو ګراف لوړ وه چې په دغه کې ډېری کوچني ماشومان وو. البته بیا هم له قدرمنو هېوادوالو مو غوښتنه دا ده چې د دوی په کور کې یو څوک ناروغه کېږي یاهم کوچنی ماشوم پر تنفسي ناروغۍ اخته کېږي، باید په لومړي سره روغتیايي مرکزونو ته مراجعه وکړي. په دغه شان حالتونو کې کله چې یو کوچنی پر تنفسي ناروغۍ اخته کېږي، په لومړي سر کې یې درملنه اسانه او شونې وي، خو کله چې پرمختللو حالتونو ته ځي نو په دغه شان حالتونو کې بیا د ماشوم ژوند هم له خطر سره مخ کېدلی شي. »
بل پلو یو شمېر روغتیاپالان بیا په لرو پرتو سیمو کې د روغتیايي مرکزونو نشتوالی او په ژمي کې د بې کیفیته نفتي توکو کارول د دغې ناروغۍ له امله د مړینې د ډېرېدو لاملونه ګڼي.
روغتیاپال کمین ساپی وايي:« په هغه چاپېریال کې چې موږ په کې ژوند کوو، موږ یې باید حفظ الصحه پاکه وساتو. خپل چاپېریال باید پاک وساتو. کلی، کور او کوڅه باید تل له ناپاکیو پاکه ولرو. په دویم قدم کې د دولتونو مکلفیتونه دا دي چې هغه حمامونه، د خښتو بټۍ چې هغه چاپېریال ککړ کوي باید په دې پوه شي چې د دې لپاره تصفیه کن کېښودل شي ترڅو د هېوادوالو ژوند مو خوندي واوسي.»
روغتيا نړيوال سازمان د تنفسي ناروغانو دا شمېرې داسې مهال خپروي چې دوه ورځې وړاندې ياد سازمان په افغانستان کې د ۸۰ سلنه هغو روغتيايي مرکزونو د بندېدو خبرداری ورکړی چې دغه سازمان يې مالي ملاتړ کوي.
