د پاکستاني طالبانو تحریک(ټي.ټي.پي) په پاکستان کې د ۲۰۲۵ کال لپاره نوي پسرلني عملیات اعلان کړل.
د ټي.ټي.پي له خوا په خپره شوې اعلامیه کې راغلي، دغوعملیاتو ته یې الخندق نوم ورکړی چې پر مټ به یې په ټول پاکستان کې پوځ او نورې امنیتي ادارې تر خپلو بریدونو لاندې ونیسي.
دغه راز په اعلامیه کې راغلي، په دغو عملیاتو کې به بېلا بېل بریدونه شامل وي او په دوامداره توګه به ترسره کېږي.
د اعلامیې یوه برخه: « په دې عملیاتو کې تعرضي بریدونه، هدفي بریدونه، چټکې چاپې، استشهادي بریدونه، سنایپر بریدونه، د نویو لایزر وسلو پرمټ دوامداره حملې به د پوځ په شمول د امنیتي ادارو او د هغوی په کمپونو، بیسونو او پوستو باندې په منظمه توګه دوام ولري.»
اعلامیه کې ویل شوې، د دغو عملیاتو د تطبیق لپاره یې داسې ځانګړي پوځي قطعات هم جوړ کړي چې هر ډول نظامي روزنه یې ترلاسه کړې او اوس خپلو اړوندو سیمو ته رسیدلي هم دي.
د سیاسي چارو کارپوهان بیا وايي، د ټي.ټي.پي له لوري د دغو عملیاتو په پیل سره به په پاکستان کې امنیتي وضیعت نورهم کړکېچن شي.
دوی زیاتوي، د ټي.ټي.پي له لوري د تازه عملیاتو اعلان په دې مانا دی چې د اوږد مهالې جګړې لپاره چمتوالی لري او د داسې جګړو دوام د دولتونو د پرځېدو لامل کېږي.
د دوی په خبره، اوسنی وضیعت به د پاکستان پر تجزیه کېدو پای ته ورسېږي.
د کارپوهانو په اند، په دې هېواد کې ټولې شته وسلې والې ډلې د ځواکمنېدوپه حال کې دي او لامل یې دا دی چې ولس له پوځ او نظام مخ اړولی.
د پوهنتون استاد فیض محمد ځلاند وايي: « ماته ښکاري چې د پاکستان امنیتي وضعیت ورځ تر بلې ترینګلی کېږي. د پاکستاني طالبانو هغه وروستی اعلان چې د الخندق په نوم به پسرلني عملیات ترسره کوي، دا په دې دلالت کوي چې پاکستاني طالبان ډېر ځواکمن شوي، د پراخو عملیاتو وړتیا یې پيدا کړې، د پاکستان د نظامي ځواکونو لپاره په جدي سرخوږي بدل شوي او په لویه کې د اوږدمهالې جګړې لپاره تیاری لري. موږ په افغانستان کې د دې ډول موسمي جګړو تجربه لرو او پوهېږو چې د کار په اوږدو کې ډېر خطرونه رامنځته کوي. د دغو جګړو دوام د حکومونو د ړنګېدو سبب کېږي.»
د سیاسي چارو شنونکی کمال ناصر اصولي وايي: « هغه جنګونه چې اوس په پښتونخوا او بلوچستان کې روان دي، دا به د پاکستان په تجزیې باندې منجر کېږي؛ ځکه د هرې ورځې په تېرېدو سره به دغه ډلې ټپلې لا نورې هم پياوړې شي. لامل دا دی چې ولس د پاکستان له پوځ ډېر خفه دی او زه ډاډه یم چې دلته به آزادي راځي.»
ځینې نور بیا په دې باور دي چې پاکستان د خپلو هغو سیاستونو ښکار شوی چې د نورو پروړاندې یې خپل کړی وو.
د سیاسي چارو شنونکی سلیم پیګیر وايي: « پاکستان د خپلو خصمانه سیاستونو قرباني دی. دوی د تاریخ په اوږدو کې له ډیورېنډ فرضي کرښې پورې غاړه پر پښتنو او بلوڅانو ډېر ظلمونه کړي. نن له کرښې ها خوا پرتو افغانانو د صبر کاسه ډکه شوې ده.»
د پاکستاني طالبانو تحریک په خپله اعلامیه کې دا هم ویلي، د تېرو دوه لسیزو راهیسې یې د پاکستاني پوځ او امنیتي ادارو پر وړاندې په دې موخه مبارزه پیل کړې چې په پاکستان کې په بشپړه توګه اسلامي نظام نافذ کړي او د ولس سر، مال او عزت خوندي کړي.
