د افغانستان سولې لپاره د امریکا پخوانی ځانګړی استازی زلمی خلیلزاد پاکستان په اوسنیو شرایطو کې له ګڼو بحرانونو سره مخ بولي.
خلیلزاد پر خپله اېکس پاڼه په دې هېواد کې د سیاسي، اقتصادي او امنیتي بحرانونو لاملونو ته په اشارې لیکلي، په پاکستان کې د اوسني امنیتي بحران اصلي لامل له افغانستان سره د شخړو او خپله پاکستان کې د خلکو د وژنو زیاتوالی یاد کړی.
هغه ویلي، په پاکستان کې سیاسي بحران د حکومت له لوري د پخواني لومړي وزیر عمران خان له نیول کېدو وروسته پیل شوی چې په خبره یې د نوموړي له بېرته خوشې کېدو سره ښايي پای ومومي.
هغه زیاته کړې:« پاکستان په دوامداره توګه له درېیو بحرانونو سره مخ دی: لومړی سیاسي؛ چې د عمرانخان له بندي کولو پیل شوی؛ دویم اقتصادي او سیاسي چې له افغانستان سره د شخړو زیاتېدو او د سلګونه پاکستانیانو له وژل کېدو سره پیل شوي. پاکستان بیارغونې ته اړتیا لري او دا باید د عمران خان له آزادېدو پیل شي.»
د دې ترڅنګ، د پاکستان د پلان او پراختیا وزیر اقبال چوهدري د دې هېواد په یوه پوهنتون کې غونډې ته د خبرو پرمهال ویلي، ترڅو چې په پاکستان کې سیاسي او امنیتي بحران ته حل لارې ونه موندل شي، دغه هېواد اقتصادي ثبات ته نه شي رسېدای.
چوهدري زیاتوي:« د پاکستان حکومت اقتصادي اجنډا لرونکی حکومت دی چې په هېواد کې د سیاسي درجې ساړه حالت ساتنې ته ژمن دی. بریالي ملتونه سوله رامنځته کوي او وروسته سیاسي ثبات ته رسېږي.»
د سیاسي چارو شنونکی واحد فقیري وايي: « له دغو بحرانونو د راوتلو یوازینۍ لاره یو ملي ډیالوګ دی. پاکستان باید دېته غاړه کېږدي چې له عمران خان، د پښتون ژغورنې غورځنګ، ټي.ټي.پي، د بلوڅ آزادي غوښتونکي غورځنګ او نورو مخالفینو سره مذاکراتو ته کېني. پاکستان د مشروعیت له بحران سره هم مخامخ دی.»
د چارو شنونکي هم په پاکستان کې روان ناوړه وضعیت له ترهګرۍ د ځان په ګټه، خو د ګاونډیو د تضعیف لپاره کار اخیستل او ترڅنګ یې د نورو هېوادونو په کورنیو چارو کې لاسوهنه او د ستراتیژیک عمق لټه، په دې هېواد کې د کړکېچ نور لاملونه ګڼي.
د دوی په باور، پاکستان له ایجاد سره سم د زور او جبر له لارې د پښتنو او بلوڅانو سرچینې او امکانات د خپلو دوو اصلي ایالتونو پنجاب او سند د تمويل لپاره کارولي چې همدې بې عدالتۍ، پراخې وژنې او ځپنې یاد دوه لوی قومونه د خپلو حقونو غوښتنې او په زور د آزادۍ اخیستلو ته اړ کړي دي.
د سیاسي چارو شنونکی مرتضی مطهري وايي: « د پاکستان دولت په ګاونډیو هېوادونو کې د تروریستي بریدونو په سرته رسولو او دغه راز د ګاونډیانو په کورنیو چارو کې په لاسوهنې سره، ورځ تر بلې خپل سیاسي او امنیتي وضعیت له ننګونو سره مخامخ کوي. له دې سره، ورځ تر بلې د پاکستان اقتصاد کمزوری کېږي او ستونزې زیاتېږي.»
د سیاسي چارو شنونکی خلیل احمد نادم وايي: « په پاکستان کې سیاسي، اقتصادي او امنیتي وضعیت ځکه خراب دی چې له ډېرو کلونو راهیسې د پنجاب له خوا په نورو قومونو، لکه پښتنو، بلوڅانو، سندیانو او کشمیریانو باندې ظلمونه روان دي. د دې نتیجه دا شوه چې دا قومونه د خپل حق لپاره راپاڅي.»
شنونکي په دې باور دي، که پاکستان په رښتیني ډول یادو بحرانونو ته د حل په لټه کې وي؛ نو لومړی باید خپلې تګلارې سمې، له نړۍ او په ځانګړي ډول له خپلو ګاونډیو هېوادونو سره د سیاسي لوبو پر ځای، سالم سیاست ته مخه کړي.
