د وارداتو او صادراتو برخه کې د یو شمېر ستونزو د حل په موخه د بلخ گمرک چارواکو او سوداګرو ترمنځ ګډه ناسته ترسره شوه.
ناسته کې سوداګرو د توکو لېږد رالېږد په برخه کې د يو لړ ستونزو له پيدا کېدو شکايت وکړ او له چارواکو يې د حل غوښتنه وکړه.
سوداګر وايي، د یوه خصوصي بنسټ له لوري د بلخ کرنې، اوبو لګولو او مالدارۍ ریاست په همغږۍ د دوی یو موټر توکي په ۱۵ زره افغانۍ دواپاشي کېږي چې دا اندازه پیسې خورا ډېرې دي.
یوتن پانګوال احمدشاه وايي: « له یوه واګونه څخه درې موټره بارېږي، دا سوداګرو ته هم جنجال دی او ګمرګ ته هم جنجال دی. دا اوس په حیرتان باندې کار کم دی، واګونونه کم را روان دي سل یا اتیا واګونونه راځي، که د وخت په تېرېدو سره واګونونه زیات شي نو دا به نور جنجالونه هم جوړ کړي.»
یو بل پانګوال حاجي قلندر رحیمي وایي: « دوی دواپاشي په جبري ډول ترسره کوي، زموږ هېله دا ده هغه هېوادونه چې دواپاشۍ ته اړتیا نه لري، غوښتنه یې نه کوي نو باید هغه مالونه چې دې هېوادونو ته صادرېږي دواپاشي نه شي او هغه هېوادونه چې وايي توکي دواپاشۍ ته راولېږئ؛ نو خپله سوداګر ځي غوښتنلیک ورکوي او اړ دي چې دواپاشي وکړي.»
پانګوال ذبیح الله وايي: « د دواپاشۍ موضوع په ډېری ولایتونو کې نشته او دا د اسلامي امارت مشرتابه په امر له منځه تللې، اوس مهال د حیرتان په ګمرک کې دا شته او له یوه موټره نږدې ۱۶ زره افغانۍ اخلي.»
په همدې حال د بلخ سوداګرۍ او پانګونې خونې مسوولین ټینګار کوي، چي سوداګرو لپاره دې په ګمرکونو سهولتونه زيات شي، څو په خبره يې بهر میشتې پانګه وال افغانستان کې پانګونې ته زړه ښه کړي.
د بلخ ولایت سوداګرۍ او پانګونې خونې مشر اسدالله اسدي وايي:« باید اسانتیاوې زیاتې شي چې سوداګر وهڅول شي او لا زیاته هڅه وکړي چې د هېواد مېوې او تولیدي توکي صادر کړي، لکه مخکې مو چې د وارداتو په کچه صادرات هم درلودل.»
ورته مهال د بلخ حیرتان گمرک مسوولین وایي، تر زیات بریده یې د سوداګرو ستونزې هوارې کړي او په دې هڅه کې دي چې د دوی لپاره نورې اسانتیاوې هم برابرې کړي.
د بلخ حیرتان گمرک مشر محمد عبدالله بلال وايي: « د دوی ستونزې مو واورېدې او هڅه کوو چې ستونزې یې هوارې کړو او له عمومي ریاست سره به یې هم شریکې کړو، نورو وزارتونو څخه د دوی شکایتونه هم زموږ مسوولیت دی او ان شاءالله ټولې ستونزې به یې حل کوو. اسلامي امارت هڅه کوي چې د سوداګرو ستونزو ته رسېدنه وکړي او حل یې کړي.»
د مالوماتو له مخې، د تېرو ۹ میاشتو په موده کې حیرتان گمرک له لارې د څه باندې ۳ میلیارده افغانیو په اندازه صادرات شوي دي.
