د اکتوبر پر اوومه پر غزې د اسرائیلو له خوا وروسته له هغې پراخ هوايي او بیا ځمکني عملیات پيل شول چې حماس او نورو فلسطیني ډلو پر اسرائیلو بریدونه وکړل.
ملګري ملتونه وايي، د يادو بريدونو په دوام سره په غزه کې زرګونو خلکو خپل ژوند له لاسه ورکړی، او ډېر نور په داسې شرايطو کې ژوند کوي، چې د زغم وړه نه دي.
د روغتیا نړیوال سازمان مشر تیدروس ادانوم وايي:« پر غزې د اسرائیلو لخوا د خونړیو بریدونو یو میاشت پوره شوه. له ۱۰ زرو زیات کسان یې ووژل، چې څه باندې ۴زره یې ماشومان دي. دا انسان وژنه به تر کومې روانه وي؟ موږ د جګړې له ټولو اړخونو سره خبرې کوو، څو بېړنی اوربند وشي او د دواړو اړخونو له لوري یرغمل شوي کسان ازاد شي. تاریخ به له موږ وپوښتي چې د دې ناورین په اړه مو څه وکړل؟»
د غزې د برخلیک په اړه دا څرګندونې داسې مهال کېږي، چې په دې ښار کې لا هم جګړه په شدت روانه ده او زیان یې تر ډېره عامو خلکو ته اوړي.
د سره صلیب نړیوالې کمېټې ویلي:« په غزې کې د ویر کولو وخت نشته. یوازې د ژوندي پاتې کېدلو هڅې کېږي. هغه څه چې موږ یې ګورو انساني تباهي ده. موږ د جګړې له دواړو اړخونو غواړو چې نړیوالو اصولو ته درناوی ولري او د عامو وګړو ژوند خوندي کړي.»
په غزې کې د اسرائيلو له لوري د خونړیو هوایي او ځمکنیو بریدونو په دوام اسرائیلي چارواکي په دې ټینګار کوي، چې له حماس سره له جګړې وروسته به په غزې تړانګه خپل نظامي حضور ته تر هغې دوام ورکړي، څو احساس شي، چې اسرائیل د حماس له بریدونو خوندي دي.
د اسرائیلو لومړی وزیر بینیامین نتنیاهو وايي:« اسرائیلي ځواکونه به له حماس سره له جګړې وروسته تر نامالومې نیټې د غزې ټول امنیتي مسوولیت پر غاړه واخلي، څو د اسرائیلو پر وړاندې ګواښ پاتې نه شيي.»
پر غزې د اسرائیلو خونړي بریدونه پر نړیواله کچه په کلکو ټکو غندل شوي او دغلته یې پر بېړني اوربند ټینګار کړی.
تازه په غزې کې د بشري ناورین د پای رسولو لپاره، د جاپان په کوربتوب د جي ۷ غړیو هېوادونو ناسته پرون پیل شوې او راتلونکي اوونۍ به په غزې کې د اوربند د رامنځته کېدو په تړاو سعودي عربستان هم د اسلامي هېوادونو کوربه وي.
