د امریکا د ملي امنیت شورا ویاند جان کربي ویلي، له شواهده سره داسې کره مالومات یې ترلاسه کړي چې ښيي شمالي کوریا روسیه ته پوځي وسلې لیږي.
امریکايي چارواکو رسینو ته داسې انځورونه هم ښودلي چې پکې ښکاري د شمالي کوریا په ناجین ښار کې شاوخوا درې سوه کانټینرونه روسیې ته د تګ لپاره چمتو کړي.
د سپینې ماڼۍ د ملي امنیت ویاند جان کربي خبریالانو ته وویل، متحد ایالتونه په دې باور دي چې شمالي کوریا دا وسلې د دې لپاره روسیې ته ورکړې دي چې په بدل کې یې له روسانو د خپل اټومي پروګرام لپاره پرمختللې ټکنالوژي ترلاسه کړي.
سپینې ماڼۍ یو ګرافیک خپور کړ، چې په کې ښکارې چې د سپتمبر له اوومې د اکتوبر تر لومړۍ نیټې کانټینرونه په داسې بېړیو کې باریږي چې د روسیې بیرغ پرې رپيږي او بیا د ریلګاډي له لارې د اوکراین د پولي خواته د وسلو په یوه زیرمتون کې ځای پر ځای کیږي.
جان کربي ویلي، د شمالي کوریا دا هڅه غندي او امریکا به د دې څارنه کوي، چې نورې وسلې هم روسیې ته ورسپاري که نه.
