په لوګر کې د سنځل ګل دودیزه کلنۍ مشاعره تر سره شوه

په لوګر ولایت کې د چهار شنبې پر ورځ د « ۱۴۰۱ کال د غبرګولې پر ۴ مه» د سنځل  ګل دودیزه کلنۍ مشاعره ترسره شوه. 

په  مشاعره کې د هېواد د بېلا بېلو ولایتونو لسګونه مشهورو شاعرانو، فرهنګیانو او د شعر او ادب مینه والو ګډون کړی وه. 

مشاعرې ته د اطلاعاتو او فرهنګ وزارت  د ګرځندوی معین عتیق الله عزیزي وویل،  د دغو ډول سترو مشاعرو له لارې کولای شي،خلکو ته د هېواد فرهنګي څېرې روښانه او د ژبې خدمت وکړي. 

عزيزي زیاته کړه:« دا زموږ او تاسو د خپل اصلي فرهنګ او ادب او هنر د هغه تمثیل ناستې هم دي. موږ به د خپلو دغه شان، مشاعرو، ادبي ناستو په لړ کې، د خپلو ولسونو، د خپلو مشاهیرو یادونه کوو، د هغوی به ستاینه کوو. دلته به زموږ نوی نسل روزل کېږي. د شعر او نظم په ژبه  د خپل راتلوونکي جوړېدو لپاره به دلته  ژمنه کوو.» 

که څه هم تېر کې به شاعرانو په دغه ډول ناستو کې له جنګه د کرکې او ملي پخلاينې پيغامونه وړاندې کول، خو دا ځل شاعرانو هم د شعر په ژبه له اسلامي امارت د نجونو پر مخ د ښوونځيو د پرانېستلو او له ولس سره د شته واټن راکمېدو غوښتنې درلودې. 

د لوګر د اطلاعاتو کلتور رئیس رفیع الله صمیم وايي،هڅه کوي،د دغه ډول لویو ناستو او مشاعرو په ترسره کولو سره د ولسونو او په ځانګړې توګه د بېلابېلو سیمو د شاعرانو تر منځ واټن راکم کړي. 

صمیم زیاته کړه:« دا ډول ناستې واقعا ډېرې مهمې دي،د  شاعرانو د یوالي لپاره،د شاعرانو د پیغام رسولو لپاره،د شاعرانو د هڅونې لپاره ډېرې مهمې دي. زموږ غوښتنه همدا ده،چې په ټول افغانستان کې دا ډول مشاعرې جوړې شي، ترڅو شاعران په کې خپلې وړتیاوې وښي او خپل هغه پیغام یې چې په شعر نغښتی دی، تر خلکو پورې یې ورسوي.»  

د « سنځل ګل  دودیزه کلنۍ مشاعره »د هېواد يو له هغو لویو فرهنګي او ادبي ناستو يوه ده چې هر کال په ياد ولایت کې جوړيږي. 

یوازې د سنځل ګل مشاعره نه ده،چې هر کال په لوګر ولایت کې تر سره کیږي، بلکې دې ته ورته په ډېری ولایتونو کې کلنۍ دوديزې مېلې او مشاعرې شته دی،چې د فرهنګیانو او اديبانو له لورې هر کال ترسره کېږي.