د ملي روغې جوړې عالي شورا مشر ډاکټر عبدالله عبدالله نن کابل کې د یوه خبري کنفرانس پر مهال وویل، که پر افغان ولس تپل شوې جګړه دوام وکړي، نو حکومت له خلکو د دفاع پرته بله لاره نه لري.
عبدالله وايي، سوله د افغانانو غوښتنه ده او د زور له لارې واک ته د رسیدو محاسبه غلطه ده.
هغه وايي، د امریکا ولسمشر جو بایډن ډاډ ورکړی، چې امریکا به د سولې پروسه کې د افغانستان له خلکو سره وي او دغه راز به د افغان ځواکونو ملاتړ هم کوي.
له واشنګټن څخه د راستنیدو وروسته هغه په خپل لومړني خبري کنفرانس کې وویل، جګړه د حل لار نه ده او که چېرته طالبان د زور له لارې واک ته د رسېدو فکر کوي، نو غلطه محاسبه یې کړې ده.
عبدالله همداراز زیاته کړه، د سولې لپاره هڅې روانې دي او دی هیله من دی،چې مثبته پایله به ورکړي.
د عبدالله په خبره، د امریکایي ځواکو وتل د افغانستان پر وضیعت بده اغېزه کړې او طالبان لا هم د سولې خبرو نیت نه لري.
عبدالله غوښتنه وکړه، چې عام افغانان ، علما او سیاسیون دې د افغان امنیتي او دفاعي ځواکونو ملاټر وکړي
