د پاکتیا ولایت کې هم د نورو ولایتونو څېر سلګونه اوسېدونکو د امنیتي ځواکونو پر ملاتړ او د وسله والو طالبانو پر ضد وسله وال پاڅون وکړ.
پاڅون کوونکي وایي، د سیمو ساتلو په موخو له امنیتي ځواکونو سره اوږه پر اوږه ولاړ دي او اجازه به ورنه کړي، چې طالبان یې سیمو کې عامه تاسیسات وران او خدمات ودروي.
په مشرانو جرګه او ولایتي شورا کې د خلکو استازي وایي، دغه سلګونه پاڅون کوونکي به د جګړې لومړۍ کرښه کې د امنیتي ځواکونو ترڅنګ ولاړ وي او د سیمو ساتنه به کوي.
مشرانو جرګه کې د پکتیا استازی محمدا جان منګل وايي: « دغه پاڅون کوونکي به دغه خاورې او امنیتي ځواکونو تر څنګ کې ولاړ وي. انشاء الله هیڅکله به دښمن ته اجازه ورنه کو ، چې زموږ په وطن کې هغه څه وکړ، چې هغه ناروا وي.»
د ولایتي شورا مشر عبدالمالک ځاځي وايي:« هغه څوک چې زموږ معارف او صحت برخه کې تیرو ۲۰ کلونو کې د حکومت په موجودیت کې ترسره شوي اجازه نه ورکوو،چې له منځه یووړل شي .»
دغه وسله وال پاڅون کوونکي وایي، د جګړې ډګر کې تر پایه پاتې کېږي او وسله والو ته اجازه نه ورکوي، چې عامه تاسیسات یې وران کړي.
د پکتیا اوسېدونکی ښایسته جان احدي وايي:« هغه څوک چې د افغانستان تاسیسات ورانوي، هغه څوک چې د پردیو لپاره کار کوي او موږ د افغان ځواکونو پر ملاتړ د پکتیا په ډیری سیمو کې پاڅون کړی دی.»
د پکتیا یو بل تن اوسېدونکی کرامت الله کرامت وايي: « له امنیتي ځواکونو ملاتړ کوو او ټولو ته د خپل ملاتړ ډاډ ورکوو او په سرو مال ورسره ولاړ یو.»
پکتیا کې سلګونه کسان داسې مهال د امنیتي ځواکونو پر ملاتړ وسله وال پاڅون کوي، چې د ۱۴ ولسوالیو له ډلې نیمایي لا هم د طالبانو تر کنټرول لاندې دي او طالبان وایي، پرون شپه یې مېرزکه ولسوالۍ د دویم ځل لپاره هم نیولې ده .
امنتیي چارواکي بیا د مېرزکې ولسوالۍ بېرته نیول ردوي او وایي،د پاتې ولسوالیو د نیولو عملیات دوام لري.
