امریکا او فرانسې ایران ته ګواښ کړی، چې د اټومي هوکړې لپاره کافي وخت په واک کې نه لري.
د امريکا د بهرنيو چارو وزير انتونیو بلېنکن له خپل فرانسوي سيال سره په پاريس کې ليدلې او د دواړو هېوادونو ترمنځ اړيکو په پياوړتيا يې خبرې کړې دي.
په دې ليدنه کې دواړو خواوو ايران ته د ګواښ په توګه ويلي، چې ۲۰۱۵ کال اټومي هوکړې ته د ورتګ په موخه يې مهلت په پايته رسېدو دی او که ويانا کې يې خبرې اوږدېږي، نو دغه هېواد به اټومي فعاليتونه زيات کړي.
بلېنکن خبريالانو ته ويلي، هېواد يې له تهران سره اوس هم زيات تناقضات لري او په دې اړه خبرې روانې دي.
امريکا په ۲۰۱۸ کال کې د مخکيني ولسمشر ډانلډ ټرمپ واکمنۍ پر مهال له دغه تړون بهر شوه، چې اوس مهال دغه تړون ته د واشنګټن د بېرته ورګرځېدو په موخه ويانا کې خبرې روانې دي.