افغان ولسمشر محمد اشرف غني د یوه لوړپوړي دولتي پلاوي په مشرۍ په دوه ورځني سفر امریکا ته ولاړ.
د ولسمشرۍ ماڼۍ له لوري په خپره شوې خبرپاڼه کې راغلي، چې د ولسمشر لومړی مرستیال امرالله صالح، د ملي روغې جوړې عالي شورا مشر عبدالله عبدالله، د بهرنیو چارو وزیر حنیف اتمر، ملي امنیت سلاکار حمدالله محب، د دوو ښځو په ګډون د مذاکراتي پلاوي غړي او د افغانستان د بشري حقونو خپلواک کمېسیون مشره د ولسمشر غني ملتیا کوي.
خبرپاڼه کې ویل شوي: « ولسمشر غني به په دې سفر کې له ولسمشر جوبایډن، د کانګرس او سنا له غړو او یو شمیر لوړپوړو امریکايي چارواکو او سیاستوالو سره د دواړو هېوادونو ترمنځ د اړیکو پر نوي څپرکي، د دیپلوماتیکو اړیکو پر پیاوړتیا او د افغانستان د دفاعي او امنیتي ځواکونو پر تمویل او تجهیز، له ترهګرۍ سره د مبارزې پر موضوع او له افغانستان سره په اقتصادي او پرمختیايي برخو کې د امریکا د همکاریو پر سر بحث او خبرې وکړي.»
هېواد کې د امنیتي حالت له ترینګلي کېدو او امریکا ته د ولسمشر غني سفر په درشل کې د امریکا وال سټریټ ژورنال ورځپاڼې په یوه مطلب کې لیکلي، د امریکايي سرتېرو تر وتلو، ۶ میاشتې وروسته کېدای شي، افغان دولت وپرځېږي.
ورځپاڼې د امریکا استخباراتي ادارو د ارزونې پر بنسټ لیکلي، وروسته له دې،چې اوونۍ وړاندې طالبانو په شمالي ولایتونو کې یو شمېر سیمې ونیولې، د امریکا استخباراتي ادارو خپلو مخکینو خوشبینانه وړاندوینو ته له سره کتنه وکړه.