د ولسمشر محمد اشرف غني د سفر اجنډا ډېره واضح نه ده،خو له امریکا سره به د اړیکو په نوي پرانیستونکي فصل خبرې اترې ولري، چې د افغان حکومت لپاره یو مهم سفر بلل کېږي.
د ولسمشر پخوانی سلاکار عبدالستار سعادت وايي، امریکا ته د ولسمشر غني د سفر غوښتنه له هغه وخته وه، چې اجنډا یې په افغانستان کې د بهرنیو ځواکونو پاتې کېدل وو.
سعادت وايي، اوس چې دا بحث تړل شوی، داسې باور کېږي،چې امریکا به ولسمشر غني ته واضح ووایي،چې د ده د قدرت په بیه هم کېدای شي باید افغانستان کې سوله وشي او غیر له دې به امریکا د مرستو د محدودیت بحث راپورته کړي.
سعادت زیاته کړه: « د سفر غوښتنه مخکې له امریکا شوې وه،هغه وخت اجنډا دا وه،چې امریکایان خپل پوځونه ونه باسي،خو دا غوښته ډېره وروسته ومنل شوه اوس به دا بحث نه وي.
امریکایان به ظاهرا ځینې مرستې اعلان کړي، د حکومت ملاتړ به وکړي، خو په اصل کې د امریکا ولسمشر دا ځل ولسمشر غني ته واضح پیغام لري او هغه داده،چې که د ده په قدرت او قېمت هم کېږي، سوله باید وشي او کنه غیر له هغې به د امریکا د مرستو د محدودیت بحث وي.»
داسې باور کېږي،چې ولسمشر غني به د امریکا کانګرس ته هم وینا وکړي.
د امریکا د کانګرس یو شمېرغړي له افغانستانه د بهرنیو ځواکونو له وتلو سره کلک مخالف دي.
د سیاسي چارو یو شمېر تحلیل کوونکي وايي، تمه یې دا ده،چې ولسمشر باید له امریکا وغواړي،چې په پاکستان باندې فشار راولي.
د سیاسي چارو شنونکی خلیل نادیم وايي:« پیغام د ولسمشر امریکا ته دا ده،چې افغان حکومت په یوازې توکه د نړیوالو د اکمالاتو او لوژیستیکو مرستو پرته د هغو هېوادونو او ډلو سره مبارزه نه شي کولائ، چې د ترهګرۍ ملاتړ کوي او په سیمه کې یې ثبات زیانمن کړی دی.»
امریکا د افغان حکومت او طالبانو ترمنځ له بې پایلو خبرو خوښ نه ښکاري.
افغانستان کې د سولې لپاره د نړیوالو هڅې د اوس لپاره له ناکامۍ سره مخ دي او د خبرو اترو په ځای د جګړې په ډګر فعالیت او تمرکز تر بل هر وخت زیات شوی دی.
ولسمشر غني په داسې مهال د یو پلاوي په مشرۍ امریکا ته په سفر ځي،چې سیمه ییزه حکومتولي یې د طالبانو په مټ له کړکېچ سره مخ ده او نږدې هره ورځ یو شمېر ولسوالۍ د طالبانو لاسته لوېږي.