کابل کې د سولې اړوند سمپوزیم یا د سولې په اړه د همفکرۍ ناسته کې ټېنګار وشو، تر هرڅه وړاندې بايد د جمهوريت پر استازيتوب واحد فکر او تګلاره رامنځته شي.
په پاکستان کې د افغانستان پخواني سفير او د ژوغورنې غورځنګ مشر حضرت عمر زاخېلوال په خپلو خبرو کې پرحکومت نیوکه وکړه،چې د سولې فرصتونه یې له منځه وړي دي.
له طالبانو هم غوښتنه وشوه،چې د سولې خبرو ته دې غاړه کېږدي او د جنګ او زور له لارې به یې واک ته په رسېدو افغانستان کې امن او ثبات رانشي او نه به يې واکمنۍ بقا وکړي.
د ملي روغې جوړې عالي شورا مرستیال عزیز الله دین محمد وايي:« د زور له لارې واک ته رسېدو سره به امن او ثبات رانه شي. دا خلک زور ته غاړه نه ږدي. دا خلک یوازې هغه وخت تابع کېږي، چې د دوی ابرو، ځان، مال، د کار آزادي ، د وینا آزادي دې ټولو ته درناوی وشي. »
د ملي امنيت پخواني سلاکار رنګين دادفر سپنتا د دوحې هوکړه د افغان سولې لپاره بې ګټې ياده کړه او په سمپوزيم کې غوښتنه وشوه،چې د جنګ ښکېل اړخونه دې بين الافغاني خبرو ته ارزښت ورکړي.
له دې سره د ناستې ګډونوالو د ملي روغې جوړې عالي شورا له کړنو نارضايتي ښکاره کړه او ټینګار پر دې و، چې د سولې په بهير کې دې د پارلمان او نورو قانوني تشکيلاتو ونډه زياته شي.
