د ناټو د غړو هېوادونو د دفاع او بهرنیو چارو وزیران نن د افغانستان په اړه پر مهمو مسایلو خبرې کوي.
د ناټو عمومي منشي ینس سټولټنبرګ رسنیو ته ویلي، دې غونډه کې د افغانستان پر روان وضعیت، د سولې پر هڅو، د بهرنیو ځواکونو پر وتلو، د سرتېرو تر وتلو وروسته د افغان پوځ پر ملاتړ او په یوه بل هېواد کې د افغان ځواکونو د روزنې ماموریت په اړه بحثونه کېږي.
سټولټنبرګ ویلي، افغانستان کې به د ناټو ملکي ماموریت دوام کوي او هڅه کوي، له دغه هېواد سره د ظرفیت جوړونې او پرمختګ په برخه کې همکارۍ ډېرې شي.
ټاکل شوې ده، چې په دغه غونډه کې نن د شااوخوا ۳۰ هېوادونو د بهرنیو چارو او دفاع وزیران ګډون وکړي.
پرون د ناټو سرمنشي ینس سټولټنبرګ منلې ده، چې په افغانستان کې اوسنی امنیتي وضعیت سخت او ننګوونکی دی، خو له دې هېواده یې د پوځیانو د اېستلو پرېکړه پر ځای بللې.
سټولټنبرګ بروکسل کې یوې خبري ناستې ته ویلي، له افغانستانه د پوځیانو اېستل خطرونه لري، خو د پوځیانو پرېښودل هم د ستونزې حل نه دی.
هغه افغانستان کې د ناټو پوځیانو پاتې کېدل د جګړې د دوام او د لا ډېرو قربانیو په معنا بللي، خو په ورته وخت کې یې دا هم ویلي، افغان ځواکونه د بهرنیانو له ملاتړ پرته دا وړتیا لري، چې خپله خاوره وساتي.
