وسله والو طالبانو په وروستیو څو اونیو کې د هرات ښاراو ولسوالیو کې خپل تحرکات زیات کړې دي.
د ولایتي شورا استازي اندیښنه ښه یې،چې جګړه د ښار مرکز ته رسیدلي او که د مخنیوي لپاره يې ګام وانخېستل شي،ښايي حالت نور هم کړکېچن شي.
د هرات ښارګنج سیمه کې د شنبې په شپه درې پرله پسې چاودنې وشوې،چې وروسته د ډزو غږونه اورېدل کېدل.
د جمعې په ورځ د کهسان ولسوالۍ په قدوس آباد سیمه کې هم د طالبانو او افغان ځواکونو ترمنځ جګړه شوې،چې ۶ ټپیان حوزوي روغتون ته انتقال شوي.
د هرات د ولایتي شورا مشر کامران علیزی وايي: « له بده مرغه جګړه نن تر ښاره رارسېدلې ده. دا توپير نه کوي، چې جګړه د یوې دقیقيې لپاره ده او که د یوه ساعت لپاره، دا چاره د هرات پر خلکو، تاثیر کوي. دولت باید د مخنیوي لپاره یې اړین ګامونه پورته کړي.»
بل پلو د هرات والي سید وحید قتالي هم مني،چې ښار کې د طالبانو ځیني شبکې فعاله دي او کله ناکله د خلکو امنیت ګواښي.
قتالي زیاته کړه: « هرات ښار کې د وسلوالو طالبانو شبکې فعاله دي، دا شبکې وخت ناوخت امنیتي ځواکونه، وتلې څېرې او عام خلک ترور کوي. موږ ډېری د دې شبکو غړي نیولي دي.»
قتالي ټینګار کوي،چې تېرو درېیو میاشتو کې يې ګڼ شمیر کسان د طالبانو په تور نیولي.
هغه وايي، د هرات په اوبې ولسوالۍ کې هم د افغان امنیتي ځواکونو ترمنځ جګړه روانه ده او ځواکونه يې په کلکه مقاومت کوي.
قتالي وايي:« اوبې ولسوالۍ کې جګړه دوام لري، لازم ځواکونه دې ولسوالۍ ته استول شوي. »
پرون شپه هم د هرات اسلام کلاه لويې اړونده سیمه کې یو ځوان د وسله والو کسانو له لوري وژل شوی.
د هرات اوسیدونکي د جګړې له ښکیلو خواوو،غواړي،چې نور دي جګړه بس او اوربند وکړي.
د هرات اوسېدونکی وايي: « د جګړې له ښکېلو اړخونو غواړم، چې جګړه پای ته ورسوي، ترڅو موږ ټول په سوله کې خوشحاله ژوند وکړو. »
د اوبې ترڅنګ کهسان، غوریان، ګلران، شینډنډ، پښتون زرغون او فرسي هغه ولسوالۍ دي،چې وخت ناوخت ورڅخه د جګړو او نا امنیو راپورونه ورکول کیږي.
