نږدې ۹۳ سلنه کردانو د خپلې خپلواکۍ په تړاو په وروستۍ ټول پوښتنه کې موافقې رایې ورکړې دي.
د کردانو د ټول پوښتنې کمیسیون وايي، یواځې ۷ سلنه کردانو د خپلواکۍ اخیستلو لپاره منفي رایې ورکړې دي
بل خوا بیا د عراق پارلمان کرد میشتو لانجمنو سیمو ته د عراقي پوځیانو د استولو پریکړه کړې ده.
د عراق په شمال کې د کردانو له خوا د تېرې دوشنبې د ټول پوښتنې رسمي پایلې اعلان شوې.
د کردانو د ټول پوښتنې د کمیسیون مشر وايي، په ټول پوښتنه کې نږدې ۹۳ سلنه کردانو له عراق څخه د خپلواکۍ اخیستلو لپاره موافقې رایې ورکړې دي.
د کردانو د ټول پوښتنې د کمیسون مشر هیندرین محمد داسې وویل (( د ګډونوالو شمېر ۷۲.۱۷ سلنه، د موافقو رایو شمېر ۲.۳ میلیونه و، چې ۹۲.۷۳ سلنه کیږي او ۷.۷ سلنه رایې مخالفې دي.))
کردي وګړو د روانې سپتمبر میاشتې په ۲۵ مه نیټه د خپلواکۍ اخیستلو په موخه په ټول پوښتنه کې پراخ ګډون وکړ او له ټول پوښتنې وروسته یې دغه هڅې په خوښیو ولمانځلې.
له دې سره د عراق پارلمان پریکړه کړې، چې حکومت باید کرد میشتو لانجمنو سیمو ته عراقي ځواکونه واستوي او هلته یې ځای پر ځای کړي. د عراق د پارلمان مشر پر لومړي وزیر حیدرالعبادي غږ وکړ، چې دغو سیمو ته د پوځیانو د استولو پرمان صادر کړي.
د عراق د پارلمان مشر سالم الجابوري داسې وویل (( د وسله وال ځواک اعلی قوماندان باید د عراق د یووالي او د خپلو خلکو د ساتلو لپاره د ټولو قانوني اقداماتو په منلو سره فرمان صادر کړي، چې امنيتي ځواکونه د کرکوک په ګډون ټولو لانجمنو سیمو ته واستوي لکه څرنګه چې د ۲۰۱۴ کال د جون له لسمې وړاندې وو.))
د عراق حکومت د کردانو دغه ټول پوښتنه ناقانونه بللې او خبرداری یې ورکړی، چې د کردانو د خپلواکۍ اخیستلو د مخنیوي لپاره به له هرې ممکنې لارې کار واخلي. امریکا متحده ایالتونو، مهمو اروپايي هېوادونو، ترکیې او ایران هم له دغې ټول پوښتنې او د کردانو د خپلواکۍ اخیستلو پر وړاندې سخت غبرګونونه ښودلي دي.
